ABŞ BMT-nin Qarabağa missiyasını “alqışlayır”

Vaşinqton D.C./02.10.23/Turan: Birləşmiş Ştatlar BMT-nin Dağlıq Qarabağa  qrup missiyasını "alqışlayır". Bu barədə Dövlət Departamentinin sözçüsü Metyu Miller bazar ertəsi mətbuat üçün brifinqdə TURANın Vaşinqton müxbirinə bildirib.

"Biz bu missiyanı alqışlayırıq" deyə  Miller BMT komandasının ilk hesabatına münasibət bildirərkən deyib.

Vaşinqton həmçinin regional tərəfdaşları ilə regionda ayrıca beynəlxalq missiyanın yerləşdirilməsi üzərində işləyir.

"Biz daha uzunmüddətli missiyanın necə olacağı ilə bağlı müttəfiqlərimiz və tərəfdaşlarımızla işləməyə davam edirik" daha sonra  Miller deyib.

Mətbuat katibi Dağlıq Qarabağda «etnik təmizləmə» iddiaları ilə bağlı hər hansı mövqe bildirməkdən çəkinib.

"Soyqırım və ya etnik təmizləmə ilə bağlı iddia  düşünülmüş, dəlillərə əsaslanan bir prosesə əsaslanmalıdır. Bu, mənim bu tribunadan hər hansı bir qətiyyət  dərəcəsi ilə danışa biləcəyim bir şey deyil", deyə o davam edib.

O, daha sonra əlavə edib: "Lakin bölgə mülki əhalidən boşalıb. Sözsüz ki, doğrudur... 100 minə yaxın etnik erməni Dağlıq Qarabağı tərk edərək Ermənistana gedib... Məncə, heç birimiz nə deyə bilmərik, onların neçə  faizi Ermənistanda daimi qalmağı planlaşdırır, və ya neçə faizi şərtlər imkan verərsə, qayıtmaq istəyə bilər».  Buna görə də

ABŞ  müstəqil beynəlxalq monitorinq missiyasının yaradılmasını təklif edir ki, Dağlıq Qarabağ əhalisinə şəffaflığı təmin etsin və  geri qayıtmaq istəyənlərin hər biri üçün qorunacaqlarını əmin edə bilsin.

Miller xatırladıb ki, Azərbaycan bu zəmanəti verib. "Biz hesab edirik ki, orada müşahidə və zəmanət vermək üçün beynəlxalq monitorinq missiyası olmalıdır".

TURANın müxbirinin sülh sazişi üçün hələ də yer qalıbmı sualına Miller cavab verib: "Biz düşünürük ki, mütləq olmalıdır. Dağlıq Qarabağın statusundan kənarda Ermənistanla Azərbaycan arasında mübahisə edən başqa məsələlər də var. Onları müzakirə etmək üçün sülh danışıqlarına qayıtmağa və nəticədə bu məsələlər üzrə bir qərara gəlməyə çağırırıq”

Aleks Raufoğlu