ABŞ Kadırovun anasına və ukraynalı uşaqların deportasiyasında əli olan digər şəxslərə sanksiyalar tətbiq edib

Vaşinqton/25.08.23/Turan: Cümə axşamı ABŞ ukraynalı uşaqların məcburi deportasiyasında əli olan 13 fiziki və hüquqi şəxsə qarşı sanksiya elan edib, Turan-ın Vaşinqtondakı müxbiri bildirib.

Dövlət Departamenti də ukraynalı uşaqların hüquqlarının pozulmasında əli olan Rusiya hakimiyyətinin üç orqanı üçün viza məhdudiyyətləri tətbiq edir.

Bu addım Co Baydenin Ukraynaya "sarsılmaz və davamlı dəstək" barədə bəyanatından bir neçə saat sonra atılıb.

Cümə axşamı sanksiyalara məruz qalanların arasında Putinin yaxın müttəfiqi çeçen diktatoru Ramzan Kadırovun anası Aymani Kadırova da var.

Putin özü Rusiyanın uşaq hüquqları üzrə müvəkkili Mariya Lvova-Belova kimi, ukraynalı uşaqların qaçırılması və deportasiyasına görə Beynəlxalq Cinayət Məhkəməsinin həbsi üçün order altındadır.

Sanksiyalara məruz qalan digər şəxslər arasında Rusiyanın Belqorod, Kaluqa və Rostov vilayətlərində uşaq hüquqları üzrə müvəkkillər, həmçinin Çeçenistan Respublikasının insan hüquqları üzrə müvəkkili və Çeçenistan hökumətinin sədri Müslüm Xuçiyev də var.

Sanksiyalar Rusiyanın işğal etdiyi Krımdakı Rusiya hökumətinə məxsus "Artek" düşərgəsinə və onun direktoru Konstantin Fedorenkoya da şamil edilib.

Həmin şəxslər və təşkilatlar işğal olunmuş ərazilərdən ukraynalı uşaqların zorla çıxarılmasında iştirak ediblər. Ukraynanın hesablamalarına görə, işğal başlayandan  Rusiya hakimiyyəti 19500-dən çox uşağı deportasiya edib və/və ya zorla öz evlərini tərk etməyə məcbur edib. -0-