ABŞ Qarabağ münaqişəsi zonasının minalardan təmizlənməsi üçün 2 milyon dollar ayırır

Vaşinqton/12.09.22/Turan: Bazar günü Vaşiqton Cəbubi Qafqazda 2020-ci ildə Ermənistan və Azərbaycan silahlı qüvvələri arasında intensiv döyüşlər gedən ərazilərin minalardan təmizlənməsi üçün 2 milyon ABŞ dolları məbləğində humanitar yardım ayrıldığını bəyan edib, xəbəri Turan-ın Vaşinqtondakı müxbiri verib.

"Münaqişə bölgəsində mövcud olan mina və partlamamış sursatlar mülki əhali arasında ölüm və yaralanma hallarına səbəb olur, iqtisadi inkişafın qarşısını alır və məcburi köçkünlərin evlərinə təhlükəsiz qayıdışına maneə yaradır", deyə Dövlət Departamentinin bəyanatında qeyd edilir.

"ABŞ-ın 2021-ci ilin noyabr ayında ayırdığı 500.000 dollarlıq yardımı ilə başlayan maliyyə dəstəyi minaların zərərsizləşdirilməsi sahəsində çalışan təşkilatların texniki bacarıqlarının artırılması və ərazilərin ölümcül mina və partlamamış sursatlardan təmizlənməsinə yönəlib. Sözügedən səylər insanların təhlükəsizliyinin təminatında, habelə məcburi köçkünlərin öz evlərinə qayıdaraq həyatlarını yenidən qurmasında mühüm rol oynayır", deyə bəyanatda bildirilir.

Ayrılmış yardımla bağlı hər hansı təfərrüat açıqlanmır.

Bu addım ötən həftə baş katibin Qafqazda danışıqlar üzrə baş müşaviri səfir Filip Rikerin regiona səfərindən sonra atılıb. O, Vaşinqtonun Azərbaycan və Ermənistan arasında sülhə nail olunması üzrə diplomatik səylərə dəstəyini müzakirə etmək üçün Yerevanda və Bakıda dövlət məmurları ilə danışıqlar aparır. 

Riker artıq Ermənistan baş naziri Paşinyan və digər rəsmi şəxslərlə görüşlər keçirib, "ABŞ-ın hərtərəfli sülh nizamlanması üzrə danışıqlarda Azərbaycana və Ermənistana yardım etmək qətiyyətini vurğulayıb", deyə ABŞ səfirliyinin tvitində qeyd edilir. Riker bu həftənin əvvəlində Bakıya gələcək. 25B