ABŞ Qarabağda gərginliyin deeskalasiyası üzrə səyləri davam etdirir

Vaşinqton/03.10.20/Turan: Cümə günü Vaşinqton Bakı və Yerevanı geri çəkilməyə və regionda gərginliyin deeskalasiyası üçün diplomatiyaya şans verməyə çağırıb. Bu barədə Turan-ın Vaşinqtondakı müxbiri bildirib.

Ağ Evin milli təhlükəsizlik üzrə müşaviri Robert O'Brayen Cenevrədə Rusiya Təhlükəsizlik Şurasının katibi Nikolay Patruşevlə görüşdən öncə Azərbaycan və Ermənistan liderləri ilə söhbət edib.

“Hər iki telefon zəngində (İlham Əliyev və Nikol Paşinyan ilə) mən dərhal deeskalasiyaya və Minsk Qrupunun yardımı ilə dialoqa qayıtmağa israr etdim. Bu, region və hər iki ölkənin xalqları üçün çox vacibdir”, - O'Brayen Milli Təhlükəsizlik Şurasının Tvitter səhifəsində yazıb.

Bundan əlavə, bu gün Dövlət Departamentinin yüksək vəzifəli məmuru, Avropa və Avrasiya işləri Bürosunun rəhbəri Filip Rier Dağlıq Qarabağ ətrafında vəziyyəti və digər məsələləri müzakirə etmək üçün Türkiyəyə gedir.

Öz növbəsində dövlət katibi Mayk Pompeo üçüncü tərəfləri “münaqişədən uzaq durmağa” çağırıb.

Bununla yanaşı, o, Suriya yaraqlılarının Türkiyə vasitəsilə Azərbaycana gəlməsi ilə bağlı Fransa prezidenti Emmanuel Makronun fikirlərini dəstəkləməkdən çəkinib və bildirib ki, bu məlumatların həqiqətəuyğun olmadığına ümid edir.

“Mən də bu reportajları gördüm. Bu an deyə biləcəyim  şey ancaq budur. Ümid edirəm ki, bu, belə deyil. Biz Suriyada, Liviyada döyüş meydanlarından çıxarılan suriyalı yaraqlıları gördük. Bu, böyük qeyri-sabitlik, daha çox həyəcan, daha çox döyüş, daha az sülh yaradıb. Düşünürəm ki, Dağlıq Qarabağda və onun ətrafında da eyni vəziyyət olacaq. Odur ki, ümid edirəm ki, reportajlar dəqiq olmadığı məlum olacaq”.

O deyib ki, Vaşinqton “hamını, sadəcə, bundan uzaq durmağa, atəşi dayandırmağa və dialoqun sülhün bərpası üçün metod olmasına” çağırıb.

“Biz, əlbəttə ki, bu barədə həm azərbaycanlılara, həm Ermənistan rəhbərlərinə, həm də türklərə məlumat verdik”, - o əlavə edib.-25B