ABŞ Rusiya əleyhinə yeni sanksiyalar paketini elan edib

Vaşinqton/21.04.22/Turan: Çərşənbə günü Vaşinqton Ukraynada müharibə ilə əlaqədar Rusiyaya qarşı tətbiq edilən yeni sanksiyalar paketini elan edib. Sanksiyalar onlarla fiziki və hüquqi şəxsə, o cümlədən Rusiya kommersiya bankına və virtual valyuta hasilatı sahəsində fəaliyyət göstərən şirkətə şamil edilib, xəbəri Turan-ın Amerikadakı müxbiri verib.

"Yeni sanksiyalar paketinin məqsədi Moskvanın artıq tətbiq edilmiş sanksiyalardan yayınmasına yol verməməkdir", deyə ABŞ Maliyyə Nazirliyinin bəyanatında deyilir.

Belə ki, Rusiyanın Transkapitalbankına qarşı tədbirlər Çində və Yaxın Şərqdə bir neçə bank vasitəsilə sanksiyalardan yayınmaq cəhdlərinin qarşısını almaq məqsədi güdür. Eyni zamanda sanksiyalardan yayınmaq cəhdləri ilə əlaqədar başda oliqarx Konstantin Malofeyev olmaqla, 40 şəxsə və şirkətə qarşı tədbirər görülüb.

Bundan başqa, ABŞ-ın Maliyyə Nazirliyi kriptovalyutaların imkanlarından istifadə edərək sanksiyalardan yayınmağa çalışan Rusiyanın Bitriver şirkətinə və onun Rusiyadakı 10 törəmə şirkətinə qarşı sanksiyalar tətbiq edib.

Bununla yanaşı, Dövlət Departamenti 635 Rusiya vətəndaşına, o cümlədən Rusiya Dumasının deputatlarına, Donetsk və Luqansk separatçılarının liderlərinə qarşı viza sanksiyaları tətbiq edib.

"Prezident Putinin Lukaşenko rejiminin köməyi ilə Ukraynaya qarşı apardığı səbəbsiz və əsassız müharibə dinc əhali arasında lazımsız iztirablara və minlərlə tələfata səbəb olmağa davam edir. Dünya bu müharibənin dəhşətlərini Ukraynanın Buça, İrpen və Qostomel şəhərlərinin, həmçinin Mariupol kimi hələ də işğal altında və ya mühasirədə olan Ukrayna şəhərlərinin nümunəsində görüb", deyə dövlət katibi Entoni Blinkenin bəyanatında bildirilir.

Son viza məhdudiyyətləri həmçinin "hüquq müdafiəçisi Ayyub Titiyevin hüquqlarının kobud pozuntusuna görə" Rusiya məmurları Hüseyn Xutayev, Nurid Salamov və Cəbrayıl Axmatova da şamil edilib.

Bundan başqa, Dövlət Departamenti "Belarusun 17 məmuruna demokratiyanın sarsıdılmasına görə" viza məhdudiyyətləri tətbiq edib.

TURAN-ın artıq məlumat verdiyi kimi, Bayden administrasiyası Ukrayna üçün yüzlərlə milyon dollarlıq yeni hərbi yardım paketi hazırlayır, bu paket bu gün elan ediləcək. -25B-