ABŞ Rusiyanı Ermənistana və Azərbaycana təsirindən istifadə etməyə çağırır

Vaşinqton/14.09.22/Turan: Çərşənbə axşamı ABŞ bu yaxınlarda baş verən qarşıdurmalardan sonra Rusiyanı sülhü bərqərar etməyə kömək etmək üçün Bakıya və Yerevana təsirindən istifadə etməyə çağırıb.

"Rusiyanın həm Azərbayc.ana, həm də Ermənistana böyük təsiri var. Biz Rusiyanı bu təsirdən və vasitələrdən döyüş əməliyyatlarının dayandırılmasına və bu gərginliyin aradan qaldırılmasına şərait yaratmaq üçün istifadə etməyə çağırmışıq və çağırırıq". Bu barədə Dövlət Departamentinin nümayəndəsi Ned Prays mətbuat üçün brifinqdə Turan-ın suallarına cavabda bildirib.

Praysın sözlərinə görə, Rusiya sərhədlərində daha bir münaqişənin kiminsə, o cümlədən Moskvanın maraqlarına uyğun olacağını "təsəvvür etmək çətindir".

"... Rusiya bu zorakılığa dərhal son qoyulmasına və gərginliyin azaldılmasına nail olmağa kömək etmək üçün bu təsirdən istifadə edə bilərdi", deyə o bildirib.

Dövlət katibi Entoni Blinken də bu məsələ ilə məşğul olub, hər iki ölkə liderini sülh yolu tapmağa çağırıb. O, gecə saat 1-ə qədər (Bakı vaxtı ilə səhər 9) Ermənistan və Azərbaycan liderləri ilə telefonla danışıb, hərbi əməliyyatların dayandırılmasının vacibliyini vurğulayıb", deyə Prays bildirib.

Turan-ın Vaşinqtondakı müxbirinin diplomatiyanın hələ də şansının olub-olmadığı barədə sualına cavabda Prays deyib ki, "diplomatiya hələ də yaşayır". "Bu, onillərdir davam edən münaqişədir və bizim administrasiyanın ilk günlərindən biz ona diqqət yetiririk", deyə o əlavə edib. 

Bu arada, Ermənistan və Azərbaycan sərhədində qarşıdurmalar fonunda Rusiya qoşunlarının yerini dəyişdirməsinin heç bir əlaməti yoxdur, deyə ABŞ Milli Təhlükəsizlik Şurasının nümayəndəsi Con Kirbi jurnalistlərə bildirib.

"Biz Ermənistan-Azərbaycan münaqişəsi fonunda Rusiya qüvvələrinin yer dəyişdirməsinin heç bir əlamətini görmürük", deyə Kirbi sülhməramlıları nəzərdə tutaraq qeyd edib.

Kirbi həmçinin Bakını və Yerevanı hərbi əməliyyatları davam etdirməkdən çəkinməyə çağırıb. "Biz həmçinin hər iki hökuməti diplomatik və hərbi kanallarla birbaşa əlaqələri bərpa etməyə və böhranın həlli üçün diplomatik prosesə sadiq olduqlarını təsdiq etməyə çağırırıq", deyə o əlavə edib.

Azərbaycanda səfir vəzifəsində işləmiş (1994-1997) Riçard Kozlariç kimi Cənubi Qafqaz üzrə köhnə ekspertlər üçün son qarşıdurmalardan sonra beynəlxalq əməkdaşlıq "Minsk qrupundan əvvəki dövrlərə qayıdıb".

"Aİ və Rusiyanın fərdi səyləri indi tamamilə mənasızdır. Bakının Filipp Rikerin rolunu tənqid etməsini nəzərə alaraq, onun şansı yoxdur. Yenə 1994-cü ildəki vəziyyətdir", deyə o, Turan-ın Vaşinqton müxbirinə bildirib.

Kozlariçin sözlərinə görə, Yerevan və Bakını saxlamaq çətindir. Onun sözlərinə görə, Moskva "Ukraynadakı itkiləri ilə əlaqədar" bu iştirakdan istifadə edə bilməz. "Yeganə qalib İran ola bilər", Kozlariç belə hesab edir. 25B