ABŞ Rusiyanın Ukrayna ərazilərini ilhaq etmək cəhdini pozmaq üçün müttəfiqlərini səfərbər edir

Vaşinqton/28.09.22/Turan: ABŞ və müttəfiqləri Putinin Ukrayna ərazilərini ilhaq etmək cəhdlərini pozmaq üçün beynəlxalq ictimaiyyəti səfərbər edir, bu barədə Turan-ın Vaşinqton müxbiri məlumat verib.

"Biz ilhaqın davam etməsinə görə Rusiyaya qarşı əlavə ciddi və sürətli sanksiyalar tətbiq etməyə hazırıq və tətbiq edəcəyik", deyə dövlət katibi Entoni Blinken çərşənbə axşamı Hindistanın xarici işlər naziri Cayşankarla birgə brifinqdə bildirib.

ABŞ Vladimir Putinə "indi müharibə dövrü olmadığını" deyən Hindistan baş naziri Narendra Modi ilə razılaşmaya bilməz.

"Təəssüf ki, Putin təcavüzünü davam etdirir və indi təkcə Ukrayna xalqı deyil, bütün dünya bunun nəticələrini görür. Biz heç vaxt Ukrayna ərazisinin ilhaqını tanımayacağıq", deyə dövlət katibi bildirib.

"Orada nə baş verdiyini xatırlamaq vacibdir. Rusiya əraziləri işğal edir, yerli əhalini filtrasiya düşərgələrindən keçirərək oradan köçürür. Bəzi insanlar deportasiya olunur, digərləri isə sadəcə olaraq yoxa çıxır. Oraya ruslar gətirilir, marionet hökumətlər qurulur, referendumlar keçirilir, nəticələr manipulyasiya edilir, sonra isə deyirlər ki, bu ərazi Rusiyaya məxsusdur", deyə Blinken bildirib.

O təsdiq edib ki, ukraynalılar Amerikanın onlara verdiyi silahlardan öz ərazilərini, o cümlədən Rusiya tərəfindən ilhaq olunmuş ərazilərini qaytarmaq üçün istifadə edə biləcəklər. 0