ABŞ sosial şəbəkələrdə COVİD-19-a qarşı vaksin haqqında dezinformasiya ilə mübarizə aparır

Vaşinqton/03.04.21/Turan: ABŞ vaksinlərin istehsalını və yayılmasını artırdıqca vaksinlər haqqında dezinformasiya da artır. "Biz bununla bağlı sosial şəbəkələrdə müxtəlif mənbələrdən çoxsaylı məlumatlar alırıq", -  ABŞ-ın Xəstəliklərə Nəzarət və Profilaktika mərkəzlərinin rəhbəri doktor Roşel Valenski TURAN-ın Vaşinqton müxbirinə bildirib.

ABŞ Dövlət Departamentinin Xarici Mətbuat Mərkəzinin təşkil etdiyi virtual brifinqdə jurnalistlər qarşısında çıxış edən Valenski deyib ki, vaksinlərlə bağlı dezinformasiya özlüyündə yeni olmasa da heç vaxt bu qədər dezinformasiya olmayıb.

"Bununla mübarizə aparmaq üçün yalnız obyektiv məlumat kifayət deyil. Bəzi hallarda onun nə üçün insanlar tərəfindən qəbul edildiyini və vüsət aldığını da anlamaq lazımdır", -  o qeyd edib.

Valenski “Rusiya tərəfindən dezinformasiyaya təşəbbüs olubmu?” sualına cavab verərkən  dezinformasiya mənbələrini dəqiqləşdirməkdən çəkinib.  Vaşinqton bununla mübarizə aparır, biz kütləvi informasiya vasitələrində genişmiqyaslı kampaniyaya başlayırıq, insanların vaksinin təhlükəsiz və effektiv olduğunu başa düşməsi üçün maarifləndirmə kampaniyası aparırıq", - o deyib.

Onun sözlərinə görə, ABŞ "qlobal səhiyyə sahəsində liderliyin bərpası üçün addımlar atır". ABŞ Ümumdünya Səhiyyə Təşkilatı, eləcə də bütün dünyada çoxtərəfli və qeyri-hökumət təşkilatları ilə tərəfdaşlıq şəraitində bütün dünyada ictimai səhiyyənin profilaktikası və təmin edilməsi üzrə səyləri dəstəkləmək öhdəliyini öz üzərinə götürüb.

"Biz tərəfdaş ölkələrin xəstəliklərin təhlükəsini müəyyən etmək və onlara mümkün qədər tez reaksiya vermək qabiliyyətini gücləndirmək üçün 60-dan çox ölkə ilə əməkdaşlıq edirik", - Valenski bildirib.-0-