ABŞ Türkiyə ilə F-16 müqaviləsi üzərində işləyir - Bayden

Vaşinqton/30.06.22/ Turan: Prezident Co Bayden çərşənbə günü Türkiyə prezidenti Rəcəb Tayyib Ərdoğana Finlandiya və İsveç, iki Skandinaviya ölkəsinin NATO-ya üzvlüyünə yol açan razılaşmaya görə təşəkkür edib, TURANın Vaşinqtondakı müxbiri xəbər verir.

Ağ Evin görüşlə bağlı hesabatında deyilir ki, NATO sammitində Ərdoğanla görüşü zamanı Bayden “konstruktiv ikitərəfli münasibətlərin davam etdirilməsinə sadiqliyini bir daha təsdiqlədi və liderlər hökumətlər arasında sıx məsləhətləşmələrin davam etdirilməsinin vacibliyi barədə razılığa gəldilər”.

"Liderlər Rusiyanın təcavüzünə qarşı müdafiədə Ukraynaya davamlı dəstəyini, habelə Rusiyanın Ukrayna taxılının ixracı qarşısındakı maneələri aradan qaldırmasının vacibliyini müzakirə ediblər. Onlar həmçinin Egey dənizi və Suriyada sabitliyin qorunmasının vacibliyindən danışıblar", - deyə məlumatda bildirilir.

Amerikanın Avropada artan hərbi mövcudluğu ilə bağlı danışan yüksək rütbəli Pentaqon rəsmisi deyib ki, ABŞ “Türkiyənin F-16 donanmasını modernləşdirmək planlarını tam dəstəkləyir”.

Müdafiə katibinin beynəlxalq təhlükəsizlik üzrə köməkçisi Selest Valander bildirib ki, bu, 40 ədəd Block 70 F-16 döyüş təyyarəsinin 6 milyard dollara alınması deməkdir.

ABŞ Türkiyənin öz döyüş təyyarələrini modernləşdirməsini dəstəkləyir, çünki bu, “NATO-nun təhlükəsizliyinə və deməli, Amerikanın təhlükəsizliyinə töhfədir”.

Baydenlə görüşdə Ərdoğan ABŞ prezidentinə NATO-nun güclənməsinə sadiqliyinə görə təşəkkür edib və bildirib ki, alyans artan ərzaq böhranı, Rusiyanın Ukrayna limanlarını dəniz blokadası, neft və təbii qaz problemlərinin həlli üçün birgə fəaliyyət göstərməlidir. -0-