ABŞ Ukraynanın hava hücumundan müdafiəsini gücləndirmək üçün tədbirlər görür

Bakı/01.11.22/Turan: Bazar ertəsi Rusiyanın Ukrayna ərazilərinə endirdiyi raket zərbələri nəticəsində bir neçə şəhərdə həddindən artıq əhəmiyyətli infrastrukturun dağıdılması və Kiyevin 80%-dən çoxunun su təchizatından məhrum qalması Vaşinqtonda narahatlıq doğurub, bu barədə Turan-ın Amerikadakı müxbiri məlumat verib.

"Ukrayna bu hücumların bir neçəsindən özünü müdafiə edə bilib, amma elektrik şəbəkəsinin və su təchizatının zədələnməsi ciddi narahatlıq doğurur, çünki mülki əhaliyə ziyan vurur", deyə Pentaqon nümayəndəsi jurnalistlərə bildirib və əlavə edib ki, Rusiya "terror hücumları kampaniyasını davam etdirir".

Brifinqdə Turan-ın müxbirinin ABŞ-ın Rusiyanı terrorçuluqda ittiham etməyə hazır olub-olmadığı haqqında sualına cavabda Dövlət Departamentinin nümayəndəsi Ned Prays bildirib ki, "Putinin bütün Ukraynaya ölüm və dağıntılar səpdiyinə heç bir şübhə yoxdur".

"Biz hamımız Ukrayna xalqını yalnız qəzəbləndirəcək raket zərbələrini və bombardmanları gördük", deyə o bildirib.

Prays həmçinin Rusiyanı taxıl ixracı üçün dəhliz buraxmaq müqabilində Ukraynadan öz Qaradəniz Donanmasının təhlükəsizliyinə zəmanət tələb etdikdən sonra inkişaf etməkdə olan dünyanın hesabına qəsbkarlıqda ittiham edib. O, Ukraynadan taxıl tədarükünün dayandırılmasının qeyri-müəyyənliyi ilə əlaqədar dünyada ərzaq qiymətlərinin artıq bahalaşması ilə bağlı narahatlığını bildirib.

Moskva əməkdaşlığı bərpa etməsə, qalan dünya ölkələri onu qınayacaqlar, deyə Prays G20 liderlərinin qarşıdan gələn sammitinə işarə edib.

Öz növbəsində, Pentaqon nümayəndəsi qeyd edib ki, Vaşinqton Kiyevlə, müttəfiqləri və tərəfdaşları ilə Ukraynanın müdafiəsinin gücləndirilməsi üzərində işləyir.

ABŞ artıq 1400 ədəd Stinger qısa mənzilli zenit-raket kompleksi göndərib. Müttəfiqlər və tərəfdaşlar da qısa mənzilli hava hücumundan müdafiə vasitələri tədarük ediblər.

ABŞ Ukraynaya 8 ədəd NASAM RƏM sistemi göndərmək öhdəliyi götürüb.

Bu sistemlərdən ikisi yaxın həftələrdə göndəriləcək.  

Ukrayna əsgərlərinə geniş spektr hava təhlükələrinə qarşı müxtəlif raketlərdən istifadə edən bu sistemdən istifadə təlimi keçilir.

"Biz həmçinin "Vampir" sistemi və digər radiolokasiya sistemləri də daxil olmaqla, PUA-lar əleyhinə kompleks yaratmaq öhdəliyi götürmüşük", deyə Pentaqon nümayəndəsi bildirib. 25B