ABŞ Ukraynaya 2,5 mlrd. dollarlıq yeni hərbi yardım paketi ayırır

Vaşinqton/20.01.23/Turan: Cümə axşamı Bayden Administrasiyası Ukraynaya Stryker və Bradley zirehli maşınlarının da daxil olduğu 2,5 mlrd. dollar dəyərində yeni hərbi yardım paketini açıqlayıb, xəbəri Turan-ın Vaşinqtondakı müxbiri verib.

Xatırladaq ki, bir neçə gün əvvəl Ağ Ev Ukraynaya və müttəfiqlərinə 3,8 mlrd. dollara yaxın dəyəri olan ən böyük hərbi yardım paketini ayırıb.

Yeni paketə 90 ədəd Stryker zirehli maşını və 59 ədəd Bradley piyada döyüş maşını, HIMARS sistemi üçün döyüş sursatları, habelə əlavə döyüş sursatları və hava hücumundan müdafiə sistemləri daxildir.

"Beləliklə, hazırki administrasiyanın Ukraynaya ayırdığı hərbi yardımın ümumi məbləği 27,5 mlrd. dollar təşkil edəcək", deyə dövlət katibi Entoni Blinken bildirib.

"Biz Ukraynanın müdafiəsində müttəfiqlərimizdən və tərəfdaşlarımızdan inanılmaz həmrəylik gördük və biz Ukraynanın dəstəyinə böyük töhfə vermək üçün birləşən 50-dən çox ölkəni alqışlayırıq", deyə Blinken qeyd edib.

"Bu gün bu müharibəni yalnız Rusiya dayandıra bilər. O, bunu etmədiyi müddətcə biz nə qədər lazımdırsa, o qədər də Ukraynanın yanında olacağıq", deyə o əlavə edib. 0