ABŞ Ukraynaya 600 milyon dollar dəyərində növbəti silah paketi göndərəcək və Kadırovun üç həyat yoldaşına qarşı sanksiyalar tətbiq edir

Vaşinqton/16.09.22/Turan: Cümə axşamı Bayden Administrasiyası Ukrayna üçün 600 milyon dollarlıq daha bir silah paketini təsdiq edib, xəbəri Turan-ın Vaşinqtondakı müxbiri verib.

Paketə HİMARS raket sistemləri üçün döyüş sursatları, artilleriya mərmiləri, nəqliyyat vasitələri və PUA-lara qarşı HHM sistemləri daxildir. Bu, ötən ilin avqustundan etibarən Pentaqonun ehtiyatlarından göndərilən 21-ci silah partiyasıdır.

Bu silahlar cümə axşamı Rusiya XİN-in Ukraynaya uzaq mənzilli raketlərin göndərilməsinin "qırmızı xətt" olduğunu, Bayden administrasiyasının bu xətti keçməməli olduğunu bəyan etməsindən sonra ayrılıb.

"Qeyd etmək istəyirəm ki, bizim Ukraynalı tərəfdaşlarımıza verdiyimiz silahlar yalnız bir məqsədə xidmət edir - öz ölkələrini, öz ərazilərini qorumaq, rus təcavüzkarların işğalından azad etmək məqsədinə", deyə Dövlət Departamentinin rəsmi nümayəndəsi Ned Prays gündəlik brifinqdə Turan-ın müxbirinin sualına cavabda bildirib.

Bu arada, cümə axşamı Bayden Administrasiyası Rusiyanın Ukraynaya qarşı təcavüzündə iştirakına görə 22 fiziki və iki hüquqi şəxsə qarşı yeni sanksiyaları elan edib. Onlar arasında: "Ukraynada döyüş əməliyyatlarında iştirak edən nenonasist hərbi qruplaşma olan "Rusiç" əməliyyat qrupu, o cümlədən onun iki komandiri" var, deyə ABŞ Maliyyə Nazirliyinin bəyanatında bildirilir.

Bundan başqa, Rusiyanın minlərlə Ukraynalı uşağın Rusiyaya deportasiyası üzrə səylərinə rəhbərlik edən Rusiyalı məmura, həmçinin işğal edilmiş Krımda Rusiyaya işləyən yeddi nəfərə və sanksiyalardan yayınma cəhdində iştirakı olan dörd nəfərə qarşı yönəlib, deyə Dövlət Departamentinin məlumatında qeyd edilir.

Sanksiyalar siyahısında Çeçenistan lideri Ramzan Kadırovun adı təkrarən keçir. Bu dəfə onun üç həyat yoldaşına, üç qızına və əmisi oğluna qarşı sanksiyalar tətbiq edilib. Kadırov Buçada və başqa yerlərdə də vəhşiliklər törədən döyüşçülərindən ibarət qruplar formalaşdırıb Ukraynaya göndərməyə davam edir. 25B