ABŞ Ukraynaya yardımı artırmağı vəd edir və hərəkətlərini müttəfiqlərilə koordinasiya edir

Vaşinqton/12.05.22/Turan: ABŞ Senatı Ukraynaya 40 milyard dollar həcmində yardımı təsdiqləməyə hazırdır, nüfuzlu senator Con Tyun bildirib. Bu açıqlama çərşənbə günü ABŞ və Böyük Britaniya müdafiə nazirlərinin görüşündən sonra verilib.

“Rusiyanın hücumu başqa təhlükəli mərhələyə qədəm qoyub, lakin biz Ukraynaya indi və gələcəkdə özünü müdafiə etməsi üçün lazım olanı vermək üçün müttəfiqlərlə birlikdə işləməyə davam edəcəyik”, - Pentaqonun rəhbəri Lloyd Ostin deyib.

Britaniyalı nazir Ben Uolles isə qeyd edib ki, ABŞ 2014-cü ildə Krımın qanunsuz anneksiyası anından Ukrayna hərbçilərinə təlim keçir. "Bunun sayəsində Ukrayna bu gün daha güclüdür və çox aqressiv rəqibə qarşı durmaq iqtidarındadır", - Uolles deyib.

"Bizim məqsədimiz Putinin Ukraynada uğursuzluğa düçar olmasıdır. O, uzunmüddətli perspektivdə uduzması ilə barışmalıdır”, - Vaşinqtonda reportyorlarla söhbətində bildirib. -25B-