ABŞ: Vaqner qrupunun hücumları "Rusiya hökumətinin hücumu kimi qiymətləndiriləcək"

Vaşinqton/01.08.23/Turan: Bazar ertəsi ABŞ-ın Birləşmiş Millətlər Təşkilatındakı daimi nümayəndəsi bildirib ki, Vaqner qrupunun NATO ərazisinə istənilən hücumu Rusiya hökumətinin hücumu kimi qiymətləndiriləcək, Turan-ın Vaşinqton müxbiri məlumat verib.

"Biz Vaqner qrupu ilə bağlı narahatlığımızı onlar mətbuata düşmədən çox əvvəl bildirmişik. Afrika qitəsində onların pis əməllərini gördük. Onlar Rusiya hökumətindən müstəqil fəaliyyət göstərmədikləri üçün bu, hamımız üçün təhlükədir", - mətbuat konfransı zamanı səfir Linda Tomas-Qrinfild jurnalistlərə bildirib.

O əlavə edib ki, Rusiya özü açıq şəkildə bildirib ki, Qara dənizdəki mülki gəmilərə hücum edə bilər. "Bunlar bizim Təhlükəsizlik Şurasının daimi üzvündən gözlədiyimiz hərəkətlər deyil. Bunlar Birləşmiş Millətlər Təşkilatı Nizamnaməsinin bütün normalarına, bütün dəyərlərinə ziddir və bu hərəkətlər hamı tərəfindən qətiyyətlə pislənilməlidir", - Tomas-Qrinfild deyib.

Turan-ın “Son 9 gündə Rusiyanın 180 000 ton Ukrayna taxılını məhv etməsi müharibə cinayətidirmi?” sualının cavabında  səfir deyib: "Bu taxıl ilə bir il ərzində bütün dünyada on minlərlə adamı yedirmək olardı. Odur ki,  bu, bizi narahat edir. Bu məsələni Təhlükəsizlik Şurasında qaldırdıq və bu barədə narahatlığımızı, o cümlədən  cümə axşamı ilcasında bildirməyə davam edəcəyik".

Cümə axşamı Birləşmiş Millətlər Təşkilatı Təhlükəsizlik Şurasının iclasında dövlət katibi Entoni Blinken münaqişələrdən qaynaqlanan aclıq və qlobal qida təhlükəsizliyi mövzusunda yüksək səviyyəli açıq debatlara rəhbərlik edəcək. 0