ABŞ və Aİ hüquq müdafiəçilərini qorumaq üçün əməkdaşlığı gücləndirir

Vaşinqton/05.12.22/Turan: Vaşinqton və Brüssel bütün dünyada həm dövlətlərin, həm də qeyri-dövlət subyektlərinin hüquq müdafiəçilərinə hücum etmək üçün texnologiyalardan qeyri-qanuni istifadəsini "qətiyyətlə pisləyir". Bu barədə ABŞ və Aİ-nin ABŞ hökumətinin üzvlərinin və Avropa komissarlarının bazar ertəsi Vaşinqtonda keçiriləcək yüksək səviyyəli görüşündən əvvəl dərc edilmiş birgə bəyanatında deyilir, xəbəri Turan-ın Vaşinqtondakı müxbiri verib.

"Biz bir daha təsdiq edirik ki, bütün insan hüquqları və əsas azadlıqları həm İnternetdə, həm də ondan kənarda tətbiq olunur. Dövlətlər hüquq müdafiəçilərinə qarşı hücumların qarşısının alınması üzərində işləməli və hücumlarda təqsiri olanları məsuliyyətə cəlb etməlidir", deyə bəyanatda bildirilir.

Müəlliflər xatırladırlar ki, BMT-nin hüquq müdafiəçiləri haqqında Bəyannaməsinə əsasən, dövlətlər "onların hər birinin Bəyannamədə yer alan hüquqlarını qanuni şəkildə həyata keçirdikləri zaman istənilən zorakılıqdan, təhdiddən, qisasdan, ayrı-seçkilikdən, təzyiqdən və ya istənilən digər özbaşına hərəkətlərdən qorunmasının təmin edilməsi üçün bütün zəruri tədbirləri görürlər".

ABŞ və Aİ "bütün dünyada hüquq müdafiəçilərinə qarşı onlayn təhdidlərin sürətlə artmasından və vətəndaş cəmiyyəti üçün məkanın daralmağa davam etməsindən həddindən artıq narahatdır", deyə bəyanatda bildirilir. 

"Hüquq müdafiəçiləri özbaşına və ya qanunsuz onlayn müşahidə, senzura, təqib, böhtan kampaniyaları, dezinformasiya, o cümlədən cinsiyyətlə bağlı dezinformasiya, İnternetin məqsədyönlü şəkildə kəsilməsi də daxil olmaqla, təhdid və hücumlarla qarşılaşmağa davam edirlər.

Bu hücumlar çox vaxt döyülmə, qətl, zorla oğurlanma və özbaşına həbslər də daxil olmaqla, fiziki zorakılıqlara gətirib çıxarır".

"Texnologiya şirkətlərini və İnternet platformalarını öz məhsullarından və platformalarından qeyri-qanuni istifadənin qarşısını almağa, lazımi ehtiyatlılıq nümayiş etdirməyə, onlayn zorakılığın bütün formalarına və hüquq müdafiəçilərinin qanunsuz və ya özbaşına izlənməsinə qarşı mübarizə üçün səmərəli tədbirlər görməyə... çağırırıq", deyə bəyanatda bildirilir.

Vaşinqton və Brüssel riskə məruz qalan hüquq müdafiəçilərini və vətəndaş cəmiyyəti təşkilatlarını resurslarla təmin edən Rəqəmsal Müdafiəçilərin Tərəfdaşlığı, Lifeline Ebattled CSO və ProtectDefenders.EU təşkilatlarına yardım Fondu daxil olmaqla, mexanizmləri dəstəkləməyə davam edəcək. 

"ABŞ və Aİ hüquq müdafiəçilərinə qarşı təhdidlərin qarşısının alınması və aradan qaldırılması üzrə milli səyləri, o cümlədən potensial və institutları möhkəmləndirmək və dəstəkləmək üçün tərəfdaş dövlətlərlə əməkdaşlıq etməyə hazırdır", deyə sənəddə qeyd edilir. 0