Ağ Ev: ABŞ yaxın günlərdə Ukraynaya təhlükəsizlik sahəsində yardımı elan edəcək

Vaşinqton/01.09.22/Turan: Yaxın vaxtlarda Bayden administrasiyasının Ukraynaya təhlükəsizlik sahəsində əlavə yardımı elan edəcəyi gözlənilir, çərşənbə günü administrasiya nümayəndələri bildiriblər, Turan-ın Vaşinqton müxbiri Ağ Evdən məlumat verib.

“Biz Ukrayna Silahlı Qüvvələrinə 13 milyard dollardan çox yardım göstərmişik və bunu davam etdirəcəyik”, - Milli Təhlükəsizlik Şurasından Con Kirbi telekonfrans zamanı bildirib. "Yaxın günlərdə təhlükəsizlik sahəsində yeni yardım elan ediləcək", - o deyib.

Öz növbəsində Ağ Evin mətbuat katibi Karin Jan- Pyer bildirib ki, ABŞ Ukrayna xalqının "həm zəruri, həm də uzunmüddətli ehtiyaclarını ödəməyə davam edəcək".

“Siz Ukraynaya daimi dəstəyi gördünüz. Biz həmişə demişik ki, onların cəsarəti və öz azadlıqlarını müdafiə etmək, demokratiya uğrunda mübarizə aparmaq üçün etdikləri bizdə inanılmaz dərəcədə heyranlıq yaradır və adamların bunu bilməsi vacibdir”, - o, gündəlik mətbuat konfransında deyib.

“Siz bu səyləri görməyə davam edəcəksiniz. Biz hər gün Ukrayna hökumətilə onların ehtiyaclarını öyrənmək üçün danışıqlar aparırıq”, -  o, fikrini yekunlaşdırıb. 0