Aİ ilə yeni saziş üzrə danışıqlar müddətsizdir - Məmmədyarov

Bakı/30.12.19/Turan: Azərbaycan və Avropa İttifaqı (Aİ) bərabərhüquqlu, qarşılıqlı hörmət və etimada əsaslanan tərəfdaşlıq münasibətlərini bölüşürlər. Bu barədə Azərbaycan XİN başçısı Elmar Məmmədyarov yerli KİV-lərə ilin yekunlarına dair müsahibəsində bildirib.

"Aİ rəsmilərinin çoxsaylı bəyanatlarında, eləcə də Avropa Parlamentinin qəbul etdiyi qətnamələrdə Azərbaycanın müstəqilliyi, suverenliyi və ərazi bütövlüyünə birmənalı dəstək ifadə olunur və Azərbaycan İttifaqın etibarlı və mühüm tərəfdaşı kimi qiymətləndirilir", deyə o bildirib.

Hazırda Azərbaycan böldəgə iqtisadi layihlərin həyata keçirilməsi üçün ən iri investorlardan birinə çevrilib. "Ölkəmiz Avropanın iqtisadi böhran içində boğulduğu zaman “Cənubi Qaz Dəhlizi” layihəsi vasitəsilə yalnız Yunanıstanda beş min yeni iş yerinin yaranmasına dəstək verib, 15 mlrd. avro miqdarında Avropaya sərmayə qoyub.

2020-ci ilin ilk yarısında Avropanın enerji təhlükəsizliyində vacib rol oynayan “TAP” layihəsi vasitəsilə Avropaya ilk Azərbaycan qazının nəql edilməsi nəzərdə tutulub. Ölkəmiz 1990-cı illərdə Aİ-nin yatırımına ehtiyac olan diyardan hazırda Avropanın inkişafına real dəstək verən dövlətə çevrilib. Bir sözlə, Azərbaycanın Aİ ilə münasibətlərdə keyfiyyətcə yeni vəziyyət yaranıb", deyə Məmmədyarov qeyd edib.

Məhz bu səbəblərə görə Azərbaycan Aİ ilə münasibətlərin inkişaf etidirilməsi və genişləndirilməsi üçün xüsusi, bərabərlik və qarşılıqlı hörmət prinsiplərinə əsaslanan yol seçmiş, “Strateji tərəfdaşlıq Sazişi” layihəsi üzrə danışıqların aparılmasını təklif edib və Brüssel bu təklifi qəbul edib, deyə Məmmədyarov bildirib.

2017-ci ilin fevral ayından Azərbaycan tərəfinə təqdim edilmiş layihəyə əsasən Aİ ilə yeni sənəd üzrə danışıqlar başlayıb. 3 ildən az müddət ərzində böyük həcmli layihə üzrə çoxsaylı danışıqlar raundu keçirilib, sənədin əksər hissəsi razılaşdırılıb.

Tərəflər danışıqların yekunlaşması və sənədin paraflanması və imzalanması ilə bağlı heç vaxt hər hansı tarix məhdudiyyətləri nəzərdə tutmayıblar. "Bizim üçün danışıqlarda kəmiyyət və vaxt məhdudiyyətləri deyil, keyfiyyət önəmlidir. Şablon yanaşmadan uzaq, reallıqlara söykənən və hər iki tərəfi qane edən yanaşma müsbət nəticənin əldə olunmasında mühüm amillərdən biridir. Azərbaycan tərəfi Avropa Komissiyasının yeni rəhbər heyəti ilə bu istiqamətdə işləməyə davam edəcəkdir. Azərbaycan keyfiyyətli sazişin tərəfdarıdır və onun ölkəmizin milli mənafelərinə uyğun olması mütləqdir", deyə Məmmədyarov bildirib. -06D-