Aİ müxalifətin etirazlarının dəstəklənməsi barədə fikirləri təkzib edir

Bakı/31.10.19/Turan:  Avropa İttifaqının Azərbaycandakı nümayəndə heyəti son vaxtlar bəzi KİV-lərdə yayılan “Aİ səfiri Bakı üçün küçə döyüşlərinin ssenarisini hazırlayır” fikirlərini qətiyyətlə təkzib edib.

“Azərbaycan Aİ-nin mühüm tərəfdaşı, “Şərq tərəfdaşlığı”nın iştirakçısı, həmçinin enerji sahəsində strateji tərəfdaşımızdır. Aİ həmçinin Azərbaycanın suverenliyini, müstəqilliyini və ərazi bütövlüyünü dəstəkləyir. Biz hazırda hazırlanan  insan hüquqları da daxil olmaqla, yeni hərtərəfli və ambisioz sazişin vasitəsilə tərəfdaşlığımızı inkişaf etdirmək və əməkdaşlığımızı genişləndirmək üçün birlikdə çalışırıq”, - Aİ nümayəndə heyətinin Turan-a daxil olan məlumatda deyilir.

Sonra sənəddə qeyd olunur ki, Aİ Azərbaycanda islahatlar proqramını dəstəkləməkdə davam edir. Aİ Azərbaycanda həm neft, həm də qeyri-neft sektorlarında ən böyük ticarət tərəfdaşı və investordur. “Biz əsasən təhsil və regional inkişafın dəstəklənməsi vasitəsilə Azərbaycan iqtisadiyyatının şaxələndirilməsi proqramını dəstəkləyirik”, - bəyanatda vurğulanır.

Aİ nümayəndə heyəti beynəlxalq hüquq və praktikaya uyğun olaraq Azərbaycan cəmiyyətinin bütün təbəqələri ilə əlaqələrə malikdir. “Bu o deməkdir ki, biz dinləyirik, amma kiminsə tərəfini tutmuruq. Biz hökumət, eləcə də müxalifət və vətəndaş cəmiyyəti nümayəndələri və digər qruplarla görüşürük və bu praktika bütün dünyada diplomatik xidmətlər tərəfindən tətbiq olunur”, - bəyanatda deyilir.–06D—