Amnesty International Birləşmiş Millətlər Təşkilatını COP29 iştirakçılarının azadlığını təmin etməyə çağırıb

Amnesty International Beynəlxalq İnsan Hüquqları Təşkilatı noyabrda Bakıda keçiriləcək Birləşmiş Millətlər Təşkilatı COP29 iqlim sammitinin təşkilatçılarını "ev sahibi ölkə ilə - Azərbaycan hakimiyyətilə sazişdə" insan hüquqlarına zəmanət verilməsini təmin etməyə çağırıb.

Amnesty International 4 iyul tarixli bəyanatda təkid edir ki, bu saziş imzalandıqdan dərhal sonra dərc edilsin və "potensial iştirakçılar tədbirdə üzləşəcəkləri riskləri qiymətləndirə bilsinlər".

Qeyd olunur  ki, dəfələrlə cəhdlərə baxmayaraq, Amnesty International Birləşmiş Millətlər Təşkilatı İqlim Dəyişikliyi Çərçivə Konvensiyası və Birləşmiş Ərəb Əmirlikləri arasında keçənilki COP28 üçün ev sahibi ölkə ilə sazişin mətnini bu yaxınlarda alıb.

Dubayda iştirakçıların hüquqlarının qorunması ilə bağlı bu sazişdə əhəmiyyətli çatışmazlıqlar və qeyri-müəyyənliklər olub. Bu, Azərbaycan hökumətilə sazişin də COP29-da insan hüquqlarını və mülki məkanı tam şəkildə müdafiə edə bilməyəcəyi və sammitdən əvvəl ictimaiyyət üçün əlçatan olmayacağı ilə bağlı narahatlığı artırır, bəyanatda deyilir.

"Birləşmiş Millətlər Təşkilatı İqlim Dəyişikliyi Çərçivə Konvensiyası və Azərbaycan hakimiyyəti arasında ev sahibi ölkə ilə sazişdə bütün insan hüquqlarının həm məkan daxilində, həm də xaricində qorunacağına və əməl ediləcəyinə zəmanət olmalıdır. Buna ifadə azadlığı və dinc toplaşmaqhüquqları daxildir. Bu, xüsusilə vacibdir, çünki Azərbaycan hakimiyyəti mütəmadi olaraq tənqidləri yatırır və bu yaxınlarda Anar Məmmədli kimi jurnalistləri, hüquq müdafiəçilərini və iqlimin qorunması üzrə fəalları həbs etməklə özgəfikirlilərə qarşı repressiyaları gücləndirib", - bəyanatda deyilir.

Təşkilat Məmmədlini, eləcə də hakimiyyət tərəfindən haqsız yerə saxlanılan bütün digər şəxsləri azad etməyə çağırır. 

Amnesty International Polşa, İspaniya, Böyük Britaniya, Misir və Birləşmiş Ərəb Əmirlikləri də daxil olmaqla, əvvəlki COP iqlim sammitlərinin ifadə azadlığı və dinc toplaşma hüquqlarının məhdudlaşdırılmasını necə əhatə etdiyini sənədləşdirib. Amnesty International  Azərbaycanda bu və digər hüquqların ciddi şəkildə pozulduğunu qeydə alıb ki, bu da bu il  noyabrın 11-dən 22-dək Bakıda keçiriləcək COP iştirakçılarının təhlükəsizliyilə bağlı narahatlığa səbəb olub.

"Ev sahibi ölkə ilə saziş" təşkilatçılarla ev sahibi ölkə hakimiyyəti arasında beynəlxalq görüşün aparılması qaydalarını müəyyən edir. Buraya milli qanunlar xaricində tətbiq olunan istənilən immunitetlər və imtiyazlar daxildir ki, bu, adətən tədbirdən bir neçə ay əvvəl hazırlanır.