Apellyasiya Məhkəməsi Tofiq Yaqublunu həbsdə saxlayıb

Bakı/02.11.19/Turan: Bakı Apellyasiya Məhkəməsi (BAM) noyabrın 2-də Demokratik Qüvvələrin Milli Şurasının (DQMŞ) Koordinasiya Mərkəzinin üzvü və Müsavat Partiyasının fəalı Tofiq Yaqublunun 30 günlük inzibati həbsindən verdiyi şikayətinə baxıb. O, oktyabrın 19-da polis müxalifətin mitinqinin qarşısını alarkən saxlanılıb.

Apellyasiya Məhkəməsinin 29 oktyabr tarixli əvvəlki iclasında müdafiə tərəfi birinci instansiya məhkəməsinin təhqiqat protokolunun təhrif edilməsi haqqında məsələni qaldırıb. Xüsusən, protokolda Tofiq Yaqublunun birinci instansiya məhkəməsində polisdə ona işgəncə verilməsi haqqında verdiyi bəyanatı əksini tapmayıb. Amma hakim Babək Pənahov özü işgəncə izlərini görsə də, ekspertiza təyin etməyib.

Bununla əlaqədar BAM hakim Pənahovun müdafiə tərəfin iradlarına münasibət bildirməsi üçün protokolu Nəsimi rayon məhkəməsinə qaytarıb. 

Amma noyabrın 2-də BAM-ın iclasında məlum olub ki, hakim Pənahov müdafiə tərəfin protokolun saxtalaşdırıldığı haqqında iradları ilə razılaşmayıb.

Vəkil Nemət Kərimli Yaqublunun bədənindəki izlərlə bağlı tibbi ekspertiza keçirilməsi haqqında vəsatət qaldırıb. Prosesə sədrlik edən hakim Əflatun Qasımov vəsatəti baxılmadan saxlayıb.

Daha sonra prosesdə Yaqublu özü çıxış edib. O qeyd edib ki, oktyabrın 19-da saat 15:15-də Səməd Vurğun və Füzuli küçələrinin kəsişməsində saxlanılıb. Və bu, jurnalistlərin çəkdiyi və İnternetdə yayılmış bir çox video və fotokadrlarda əskini tapıb.

Bununla belə, birinci instansiya məhkəməsində polis guya Yaqublunu Cəfər Cabbarlının abidəsinin yanında saxladığı haqqında ifadə verib.

Müxalifətçinin sözlərinə görə, saxlanıldıqdan sonra onu Nəsimi rayon Polis İdarəsinə aparıblar, əlinə qandal taxaraq, bir saat ərzində döyüblər. "Məndən siyasi mübarizədən imtina etməyi, insanları etirazlara, mitinqlərə dəvət etməməyi və bunları videokamera qarşısında söyləməyi tələb ediblər. Mən, əlbəttə ki, bu qanunsuz tələbi yerinə yetirməkdən imtina etdim və məni 30 gün müddətinə həbs etdilər", deyə Yaqublu sözünə davam edib.

O deyib ki, qanunu pozmayıb, əksinə, ona qarşı cinayət əməlləri törədilib.

Yaqublu deyib ki, artıq işgəncələrdən prokurorluğa şikayət yazıb və məhkəmədən onu döyənlərin cəzalandırılmasını tələb edir.

Yaqublu Bakı şəhər İcra Hakimiyyətinin DQMŞ-nin təklif etdiyi yerlərdə mitinqə razılıq verməməklə qanunu pozduğuna diqqət çəkib. O xatırladıb ki, Konstitusiyanın 49-cu maddəsi toplaşmaq azadlığına zəmanət verir və bu norma birbaşa təsirə malikdir. Avropa İnsan Hüquqları Konvensiyasının 11-ci maddəsində də toplaşmaq azadlığına zəmanət verilir.

Amma hakim heyəti Yaqublunun 30 gün müddətinə həbsi haqqında qərarı dəyişdirməyib.

Yaqublunun qızı Nigar Həzi bildirib ki, müxalifətçinin həbsindən və ona qarşı işgəncələrdən AİHM-ə şikayət veriləcək. -06D-