Araik Arutyunyanın Rusiyaya gizli səfəri

Bakı/25.11.20/Turan: Noyabrın 24-də səhər tezdən Moskvanın Vnukovo aeroportunun özəl təyyarələr terminalında Qarabağ separatçılarının lideri Araik Arutyunyan görülüb. Onunla birlikdə KTMT-nin qərargah rəisiin müavini Aykaz Baqmanyan da olub, o, Arutyunyanla birlikdə özəl təyyarə ilə Ermənistana qayıdıb. Bu barədə bu gün Ermənistanın Mediaport Telegram kanalı məlumat yayıb.

NEWS.AZ saytının məlumatına görə, Araik Arutyunyan gizlincə RF-yə gedib, burada öz gələcəyi məsələsini həll edib. Məsələ ondadır ki, Nikol Paşinyan separatçıların silahlı qüvvələrinin keçmiş komandanı Samvel Babayanı Qarabağın lideri təyin etmək qərarına gəlib.

Səbəb onun müharibə günlərində Paşinyanın həyat yoldaşı Anna Akopyanla yaxınlaşaraq, onun etimadını qazanmasıdır. Arutyunyan Moskvaya məhz bu ssenarinin həyata keçirilməsinin qarşısını almaq üçün gedib. Arutyunyan 25 000 avro ödəyərək, “Cessna 525 Citation jet” modelli özəl təyyarə ilə Ermənistana qayıdıb.

Moskvaya səfər faktını gizlətmək üçün Arutyunyanın mətbuat xidməti guya Laçında keçirilən müşavirə haqqında məlumat yayıb, deyə Mediaport Telegram kanalı yazır. -02D-