Armen Qriqoryan: “Bakı sülhə hazır deyil, Yerevan isə Dağlıq Qarabağ Muxtar Vilayətinin ərazisini tələb edəcək”

Bakı/23.04.21/Turan: Rusiya Federasiyasının sülhməramlı qüvvələri Qarabağda səmərəli fəaliyyət göstərir, hazırda sülh onların sayəsində saxlanılır. Sülhməramlıların qalma müddətinin uzadılması məsələsini mandatın müddətinin bitməsinə yaxın daha ətraflı müzakirə etmək mümkün olacaq, ancaq hələlik Azərbaycan sülhməramlılar olmadan regionda sabitliyin mümkün olmasının əlamətlərini göstərmir. Bu barədə Ermənistan Təhlükəsizlik Şurasının rəhbəri Armen Qriqoryan Moskvaya səfərdən öncə RİA Novosti agentliyinə müsahibəsində bildirib.

İlham Əliyevin hazırkı ritorikası Dağlıq Qarabağ məsələsinin Qarabağ və Ermənistan erməniləri üçün həyati əhəmiyyətli problem olması ilə bağlı erməni təərfinin haqlı olduğunu sübut edir.

“Erməni Zəngəzuru ilə bağlı Əliyevin istənilən bəyanatı atəşkəs haqda məlum bəyanatın mahiyyətini kökündən təhrif edir", - o, Azərbaycan prezidentinin Zəngəzur dəhlizinin tikintisində qətiyyəti barədə fikirlərini şərh edərkən bildirib.

O həmçinin işarə edib ki, Yerevan Qarabağın hazırkı vəziyyətilə barışmayacaq və "tarixi ədalət"ə nail olacaq.

"Dağlıq Qarabağ Muxtar Vilayətinin ərazisi müəyyən sərhədlərlə beynəlxalq birlik tərəfindən tanınıb və biz Dağlıq Qarabağ Muxtar Vilayətinin işğal olunmuş ərazilərini diplomatik yolla geri qaytarmaq üçün hər şeyi edəcəyik”, - o bəyan edib.

Qriqoryan 44 günlük müharibədə Ermənistanın məğlubiyyətinin Yerevanla Moskva arasında pis münasibətlərlə əlaqədar olması barədə suala mənfi cavab verib. Qriqoryan deyib ki, Ermənistan Rusiyanın ən etibarlı müttəfiqlərindən biridir. Ermənistan Rusiyanın köməyilə öz ordusunda islahatlar aparmağı və yeni silahlar almağı planlaşdırır.

Ermənistan yaxın perspektivdə Azərbaycanla sülh müqaviləsini imzalaya bilərmi və Yerevan bunu hansı şərtlərlə etməyə hazırdır? Bu sualın cavabında Təhlükəsizlik Şurasının rəhbəri deyib: "Sülh sazişindən danışmadan öncə sadə bir faktı qeyd etmək lazımdır ki, Qarabağ münaqişəsi birdəfəlik həll olunmayıb. Bu münaqişəni güc ilə və ya güc tətbiqi barədə hədə ilə həll etmək mümkün deyil”.

Onun sözlərinə görə, münaqişəni ATƏT-in yaxşı məlum olan prinsipləri əsasında həll etmək lazımdır.

"Azərbaycan nə zaman müdrik yanaşma göstərsə, rasional addımlar atsa və konstruktiv dialoq aparmağa hazır olarsa, o zaman sülh sazişi haqda düşünmək mümkün olacaq", - o əlavə edib və Əliyevin Zəngəzur barədə fikirlərini, Bakıda Hərbi Qənimətlər Parkının açılmasını tənqid edib.  

Qriqoryan “Ermənistanın müharibədə məğlub olmasının səbəbi Paşinyan və onun komandasının Soros tərəfdarı olmasıdır” fikrini inkar edib. O, bu fikri "adamları çaşdırmaq məqsədilə təbliğat hiyləsi" adlandırıb.

Qeyd edək ki, əvvəllər Qriqoryan Ermənistanın Türkiyə və Azərbaycanla münasibətlərinin normallaşmasına tərəfdar olub. -02D-