Avropa İttifaqı Rusiyaya qarşı dördüncü sanksiyalar paketini qəbul edib

Bakı/15.03.22/Turan: Martın 15-də Avropa Komissiyası Ukraynaya qarşı təcavüzünə görə Rusiyaya dördüncü sanksiyalar paketinin tətbiq olunduğunu elan edib.

- Belə ki, Rusiya dövlət sənaye kompleksi müəssisələrilə istənilən sövdələşməyə tam qadağa qoyulub;

- Rusiyadan polad idxalı qadağan edilib ki, bu da Rusiya üçün itirilmiş gəlirin 3,3 milyar avroya qədərini təşkil edəcək;

- Atom energetikasından başqa, Rusiyanın enerji sektoruna yeni investisiyalar qadağan edilib;

- Avropa İttifaqından Rusiyaya dəbdəbə əşyalarının (avtomobillər, zərgərlik məmulatları) ixracına qadağa qoyulub ki, bu da Rusiya elitasına birbaşa zərbə vuracaq;

- Sanksiya altında olan şəxslərin və təşkilatların siyahısı genişləndirilib. Siyahıda Kremllə əlaqəsi olan oliqarxlar və biznes- elita, həmçinin hərbi və müdafiə sahələrində fəaliyyət göstərən şirkətlər də var. Həmçinin siyahıya dezinformasiya ilə fəal məşğul olanlar da daxildir;

-Avropa İttifaqının kredit-reytinq agentliklərinin Rusiya şirkətlərilə işi qadağan edilib ki, bu da Avropa İttifaqının maliyyə bazarlarına çıxışın itirilməsi deməkdir.

Nəhayət, Avropa İttifaqı Ümumdünya Ticarət Təşkilatının digər üzvləri ilə birlikdə Avropa İttifaqı bazarlarında daha əlverişli şərtlərlə Rusiya mallarından və xidmətlərindən imtina etməyə razılaşıblar. Bu, Ümumdünya Ticarət Təşkilatının üzvü kimi Rusiyanı üstünlüklərdən məhrum edəcək. -02D-