Avropa İttifaqı Xarici Əlaqələr Xidmətinin mətbuat katibi Birləşmiş Millətlər Təşkilatı Beynəlxalq Məhkəməsinin qərarı barədə

Bakı/24.02.23/Turan: Avropa İttifaqı Birləşmiş Millətlər Təşkilatı  Beynəlxalq Məhkəməsinin məcburi qərarını nəzərə çatdırır. Qərarda göstərilir ki, Azərbaycan Laçın dəhlizi ilə adamların, nəqliyyat vasitələrinin və yüklərin hər iki istiqamətdə maneəsiz hərəkətini təmin etmək üçün öz sərəncamında olan bütün tədbirləri görməlidir. Bu barədə Avropa İttifaqı Xarici Əlaqələr Xidmətinin mətbuat katibinin 24 fevral tarixli şərhində deyilir.

"Avropa İttifaqı Laçın dəhlizində mövcud olan maneələrdən və bundan irəli gələrək yerli mülki əhali üçün humanitar nəticələrdən əvvəlkitək narahatdır. Dəhlizin istifadəsilə bağlı Azərbaycanın bütün narahatlıqları yalnız dialoq yolu ilə həll edilə bilər və edilməlidir.

Avropa İttifaqı bir daha Azərbaycan hakimiyyətini və bütün məsul şəxsləri 9 noyabr 2020-ci il tarixli üçtərəfli bəyanat çərçivəsində götürülmüş öhdəliklərə uyğun olaraq Laçın dəhlizilə sərbəst və təhlükəsiz hərəkəti təmin etməyə çağırır. Biz həmçinin zərərçəkmiş əhalinin qaz, elektrik enerjisi və digər xidmətlərlə fasiləsiz təchizatının təmin edilməsinin zəruriliyini vurğulayırıq.

Avropa İttifaqı əvvəlkitək Cənubi Qafqazda sülhün və təhlükəsizliyin möhkəmləndirilməsi üzrə səylərin dəstəkləməsində ən yüksək səviyyədə iştirak edir", - şərhdə deyilir. 0