Avropa İttifaqının ali nümayəndəsi Azərbaycan və Ermənistan xarici işlər nazirləri ilə danışıqlar aparıb

Brüssel / 22.07.20 / Turan: İyulun 22-də Avropa İttifaqının Ali Nümayəndəsi Cozef Borrell Ermənistan və Azərbaycan Xarici İşlər Nazirləri ilə iki ölkənin dövlət sərhədindəki son silahlı münaqişəni müzakirə etmək üçün üç tərəfli telefon danışığı keçirib.

Avropa İttifaqının Ali Nümayəndəsinin ofisindən  verilən açıqlamaya görə, üç tərəfli söhbət  Ali Nümayəndənin  iki nazir ilə ayrıca telefon danışığından sonra baş tutub.

Müzakirələr zamanı Jozef Borrell hər iki tərəfi silahlı qarşıdurmaya son qoymağa və gərginlik yaradan hərəkətlərə və ritorikaya, xüsusən də bölgədəki kritik infrastruktura qarşı mümkün  təhdidlərdən çəkinməyə çağırıb.  Borrell bütün bölgə “oyunçularının” bu dinc hədəfə töhfə verməli olduğunu vurğulayıb.

Ali Nümayəndə hər iki tərəfi atəşkəs rejiminə sadiq olduqlarını bir daha təsdiqləməyə və  gərginliyin daha da artmasının qarşısını almaq üçün təcili tədbirlər görməyə çağırıb.

Bu çərçivədə Ermənistan və Azərbaycan birbaşa ünsiyyət mexanizmindən, ATƏT-in Minsk Qrupunun formatından, həmçinin ATƏT-in fəaliyyətdə olan sədrinin şəxsi nümayəndəsinin mandatından istifadə etməlidirlər.

Borrell, həmsədrlərin himayəsi altında Dağlıq Qarabağ münaqişəsinin nizamlanmasının başlıca aspektləri ilə bağlı əsaslı danışıqları bərpa etməyin və ATƏT-in yerində monitorinqini bərpa etməyin zəruriliyini vurğulayıb.

Press-relizə görə, hər iki nazir bununla razılaşıb.-0-