Avropa Şurası Parlament Assambleyasının komitə rəhbəri Bakı və Yerevanı əsirlər və minalanmış sahələrin xəritələrilə bağlı əməkdaşlığa çağırıb

Bakı/13.04.21/Turan:  "Ermənistanla Azərbaycan arasında bu yaxınlarda baş vermiş münaqişə nəticəsində ehtimal olunan əsir və itkin düşmüş şəxslərin taleyindən çox narahatam", - Avropa Şurası Parlament Assambleyasının  Miqrasiya Komitəsinin sədri Pyer Alen Fridez (İsveçrə) aprelin 12-də komitənin iclasında bu məsələ ilə bağlı müzakirələrdən sonra bildirib.

Onun sözlərinə görə, Azərbaycan hökuməti əsir ermənilər barədə məhdud məlumat verib və Avropa İnsan Hüquqları Məhkəməsinin məlumatına görə, onların sayı 188 nəfərdir.

Azərbaycan Avropa məhkəməsilə əməkdaşlıq etməli, həmin şəxslərin yeri və taleyi haqda məlumat verməli və "onların onların dərhal qaytarılmasını təmin etməlidir", - o deyib.

"Bu yaxınlarda baş vermiş münaqişə nəticəsində itkin düşmüş şəxslərin ümumi problemindən, habelə ümumilikdə 1991-1994 - cü illər münaqişəsi nəticəsində itkin düşmüş şəxslərin taleyindən  narahatam.

Ermənistan və Azərbaycan ilkin şərt olmadan əməkdaşlıq etməli və Beynəlxalq Qızıl Xaç Komitəsinin köməyilə itkin düşmüş şəxslərin problemini həll etməli, bütün əsirlərin tezliklə azad olunmasını təşkil etməlidirlər", -  Fridez deyib.

Həmçinin o, Ermənistanın minalı sahələrin xəritələrini verməkdən imtina etməsindən ciddi narahatlığını bildirib. "Əgər belə informasiya varsa, təcili olaraq araşdırılmalıdır və ümid edirəm ki, Ermənistan və Azərbaycan davam edən ölüm və xəsarətlərdən qaçmaq üçün əməkdaşlıq edəcək və bu təxirəsalınmaz problemi həll edəcəklər", - o vurğulayıb. -02D-