Azərbaycan dünya ictimaiyyətini Metsamor Atom Elektrik Stansiyasının bağlanması üçün səyləri artırmağa çağırıb

Bakı/26.04.21/Turan: Azərbaycan dünya ictimaiyyətini nüvə təhlükəsizliyi və ətraf mühitin mühafizəsi məqsədilə Metsamor Atom Elektrik Stansiyasının bağlanması üçün səyləri artırmağa çağırıb.

Bu çağırış Azərbaycan Xarici İşlər Nazirliyinin Çernobıl Atom Elektrik Stansiyasında qəzanın 35-ci ildönümü ilə əlaqədar yaydığı bəyanatda yer alır.

Bu fəlakətin geniş miqyaslı təsiri sübut etdi ki, atom elektrik stansiyalarının təhlükəsizliyi yalnız yerləşdikləri dövlətləri deyil, potensial risklərdən zərər çəkə bilən ətraf ölkələri də narahat etməlidir.

Bu çərçivədə, Ermənistandakı Metsamor Atom Elektrik Stansiyası ilə əlaqəli risklər beynəlxalq ictimaiyyət  tərəfindən hərtərəfli şəkildə nəzərdən keçirilməlidir. 

Bu Atom Elektrik Stansiyası 1976-1980-ci illərdə Çernobılda istifadə edilən oxşar texnologiya ilə inşa edilib və aktiv seysmik zonada yerləşir. Köhnəlmiş texnologiya və mövqeyi Metsamoru dünyanın ən təhlükəli nüvə stansiyaları sırasına salır. Müxtəlif beynəlxalq təşkilatların bu obyekti “bütün bölgə üçün təhlükə” adlandıraraq xəbərdarlıq etmələrinə baxmayaraq, Ermənistan Metsamor Atom Elektrik Stansiyasının istismar müddətinin bitməsinə baxmayaraq, hələ də ondan istifadə etməyə davam edir.

2020-ci ildə Avropa İttifaqı müasir beynəlxalq nüvə təhlükəsizliyi standartlarına tam cavab verəcək şəkildə təkmilləşdirilə bilməyəcəyinə görə növbəti dəfə Ermənistanı Atom Elektrik Stansiyasını bağlamağa çağırıb.

Metsamorun istismarı zamanı köhnəlmiş texnologiyadan istifadə etmək və təhlükəsizlik qaydalarına riayət etməmək daha geniş bölgə üçün ciddi ekoloji problemlər yaradır. Bundan əlavə, yüksək dərəcədə zənginləşdirilmiş uran kimi nüvə materiallarının qaçaqmalçılıq hadisələrinin təkrarlanması, zavodun və onun nüvə materiallarının düzgün fiziki qorunması ilə bağlı əlavə narahatlıqlar yaradır.

Azərbaycan Xarici İşlər Nazirliyi “bütün müvafiq beynəlxalq təşkilatları, nüvə təhlükəsizliyi və ətraf mühit məsələləri ilə məşğul olan vətəndaş cəmiyyəti institutlarını, eləcə də bölgə ölkələrini potensial fəlakətin qarşısının alınması barədə ictimaiyyətin məlumatlılığını artırmağa və Metsamor Atom Elektrik Stansiyasının bağlanması üçün səylərini səfərbər etməyə” çağırır. -06D-