Azərbaycan-Ermənistan: ABŞ Arlinqtonda yeni danışıqlara başlamaq üçün xarici işlər nazirlərinin görüşündən "şaddır"

Vaşinqton/28.06.23/Turan: Çərşənbə axşamı ABŞ bildirib ki, danışıqları asanlaşdırmaq üçün Azərbaycan və Ermənistan xarici işlər nazirlərini qəbul etmək onlar üçün "sevinc" və "şərəf" dir. Turan-ın müxbiri Vaşinqtondan bildirib.

Azərbaycan və Ermənistanın xarici işlər naziri Ceyhun Bayramov və Ararat Mirzoyan bağlı qapılar arxasında ikitərəfli danışıqların növbəti raunduna başlamaq üçün Vaşinqton ətrafı  Arlinqtonda görüşüblər.

Bu, iki aydan az müddətdə ikinci dəfədir ki, Bayramov və Mirzoyan Dövlət Departamentinin nəzdində yeni təmir edilmiş Corc Şults adına Milli Xarici Əlaqələr Tədris Mərkəzində bir araya gəliblər.

Çərşənbə axşamı səhər dövlət katibi Entoni Blinken hər nazirlə şəxsən görüşüb,  sonra isə hər ikisilə birlikdə görüşüb. "Dialoq davamlı sülhün açarıdır", - daha sonra Blinken Tvitterdə yazıb.

Öz növbəsində, Dövlət Departamentinin rəsmi nümayəndəsi Metyu Miller mətbuat üçün gündəlik brifinqdə bildirib ki, Birləşmiş Ştatlar Ermənistan və Azərbaycanın sülh prosesində məhsuldar iştirak etmək üçün son səylərindən "ruhlanıb". "Biz bu təkanı inkişaf etdirmək üçün onlara hər cür kömək etməyə davam edəcəyik", - o deyib.

Lakin Miller danışıqların məzmunu ilə bağlı Turan-ın müxbirinin təkidli suallarına baxmayaraq, hər hansı təfərrüatı açıqlamaqdan yayınıb, ya da görüşün yekunlarından mümkün gözləntilər barədə danışmaqdan imtina edib.

"Yəqin ki, hətta bunu etsəydim belə, uğur  qazanmazdım", - o deyib. "Düşünmürəm ki, biz yolun üçdə birində danışıqlar haqda söhbət açmaq istəyirik",- o deyib.

“Bu üçgünlük görüşlər bitənə qədər nə olacağına dair mülahizə yürütməyi gözləyəcəyəm, amma biz həqiqətən düşünürük ki, əgər iki tərəf öz fikir ayrılıqlarını bir kənara qoyarsa, sülh yaxındır", - Miller fikrini yekunlaşdırıb.

Blinkenin sabahkı görüşün bağlanış mərasimində nazirlərə qoşulacağı gözlənilir.

Alexs Raufoğlu