Azərbaycan, Gürcüstan, Rumıniya və Macarıstan yaşıl enerjinin ötürülməsi haqqında saziş imzalayıblar

Bakı/17.12.22/Turan: Azərbaycan, Gürcüstan, Rumıniya və Macarıstan liderləri dekabrın 17-də Buxarestdə "Azərbaycan Respublikası, Gürcüstan, Rumıniya və Macarıstan Hökumətləri arasında yaşıl enerjinin inkişafı və ötürülməsi sahəsində strateji tərəfdaşlıq haqqında Saziş" imzalayıblar. Sənəd Azərbaycan prezidenti İlham Əliyev, Rumıniya baş naziri Nikolae Çuke, Gürcüstan baş naziri İrakli Qaribaşvili və Macarıstan baş naziri Viktor Orbanın iştirakı ilə keçirilən sammitin yekununa görə imzalanıb.

Sazişin imzalanması mərasimində Rumıniya prezidenti Klaus Yohannis və Avropa Komissiyasının sədri Ursula fon der Lyayen də iştirak ediblər.

Dördtərəfli hökumətlərarası saziş Rumıniya ilə Azərbaycan arasında bərpa olunan mənbələrdən elektrik enerjisinin nəqli üçün Gürcüstan və Qara dəniz vasitəsilə sualtı kabel layihəsinin həyata keçirilməsini nəzərdə tutur. Qara dəniz vasitəsilə sualtı elektrik ötürücü kabel layihəsi Avropa Komissiyası ilə Azərbaycan Respublikası arasında enerji sahəsində sazişin bir hissəsidir və eyni zamanda Aİ-nin "Qlobal qapı"strategiyası çərçivəsində Gürcüstan üçün flaqman layihəsidir.

"Bu gün biz Azərbaycandan Avropaya daha bir enerji körpüsünün tikintisinə başlayırıq, ölkələrimiz Avropaya etibarlı təchizatçı olmaq niyyətindədir və bu, əsasən yaşıl enerjiyə aiddir. Azərbaycanın bərpa olunan enerji potensialı 27 Giqavattdan (GVT) çoxdur — bu, günəş və hidroenerji, həmçinin Xəzər dənizindən külək enerjisidir... beləliklə, birinci mərhələdə Azərbaycanın ixracı ən azı 3 GVT təşkil edəcək", - prezident Əliyev sazişin imzalanması mərasimində bildirib.--0--