Azərbaycan Prezidentinin köməkçisi senator Menendezi açıq yalan danışmaqda günahlandırıb

Bakı/13.09.23/Turan: "Bu cür lobbizm, "pul danışıqları", azərbaycanlılara və başqalarına qarşı açıq-aşkar yalan və irqçi nifrət ABŞ Konqresinin imicinə və qlobal reputasiyasına xələl gətirir. Utancvericidir!"

Bu barədə Azərbaycan Prezidentinin köməkçisi Hikmət Hacıyev X (keçmiş twitter) hesabında ABŞ Senatının Xarici əlaqələr komitəsinin sədri, senator Bob Menendezə cavab olaraq bildirib.

Onun yazdığına görə, Bob Menendez ciddi korrupsiya iddialarına cavab vermək əvəzinə, ABŞ Senatının Xarici əlaqələr komitəsinə yalan məlumat verir və saxta şəkillərlə yalan danışır.

"Şəkildə təqdim olunan şəxs xərçəng xəstəliyindən dünyasını dəyişib. Ermənilər özləri də tibbi sübutlar təqdim etdikdən sonra bu aşkar yalandan istifadə etməkdən utanırlar", deyə Hacıyqev qeyd edib.

Senator Bob Menendez sentyabrın 12-də Senatda Laçın dəhlizi ilə bağlı çıxışı zamanı guya Qarabağ bölgəsinin ermənilər yaşayan hissəsinin blokadası nəticəsində acından ölmüş bir insanın fotosunu nümayş etdirib. O, Azərbaycan rəhbərliyini kəskin tənqid edib və Qarabağda yaşayan ermənilərin qorunması zərurətini bildirib. 03