Azərbaycan və RF güc qurumlarının əməkdaşları "Sərhəd" əməliyyatını həyata keçiriblər

Bakı/13.06.18/Turan: Azərbaycan və Rusiyanın hüquq-mühafizə orqanları qarşılıqlı razılaşma əsasında iyunun 4-10-da hər iki ölkənin sərhəd rayonlarında "Sərhəd" şərti adı altında birgə kompleks əməliyyat-axtarış və profilaktika tədbirləri həyata keçiriblər.

DİN-in mətbuat xidmətinin məlumatına görə, Dağıstanın sərhəd ərazilərində, habelə Qusar, Quba, Xaçmaz, Zaqatala, Şəki, Balakən, Qəbələ, Qax və Oğuz rayonlarında həyata keçirilmiş əməliyyatlar nəticəsində axtarışda olan 42 nəfər saxlanılıb.

Onların 11 nəfəri barəsində Rusiya Federasiyasında axtarış elan olunub. Həmçinin, 4 nəfər itkin düşmüş hesab olunan şəxs tapılıb. Bundan başqa, dövlət borcunu ödəmədiklərinə görə axtarışda olan 54 nəfər saxlanılıb.

Güc qurumlarının əməkdaşları 9 avtomat, 1 pulemyot, 6 tapança, 69 tüfəng, 36 qumbara, 29 ədəd patron darağı, 18 ədəd müxtəlif hərbi ləvazimat və döyüş sursatı, 5700 müxtəlif çaplı güllə müsadirə ediblər.

Narkotiklərlə bağlı 19 fakt aşkar edilib, 3 tondan çox çəkisi olan 13600 çətənə kolu məhv edilib.

Sərhəd rayonların ərazilərində törədilmiş 15 müxtəlif cinayətin üstü açılıb, deyə məlumatda qeyd edilir. -06D-