Azərbaycan və Türkiyə qarşılıqlı hərbi yardım haqqında saziş imzalayıb

Bakı/15.06.21/Turan: Şuşada Azərbaycan və Türkiyə prezidentləri arasında danışıqlar bir saatdan çox davam edib. Danışıqlar başa çatdıqdan sonra iki ölkə başçısı Azərbaycan və Türkiyə arasında müttəfiqlik münasibətləri haqqında Şuşa Bəyannaməsini imzalayıblar.

İlham Əliyev öz nitqində bu günü tarixi gün adlandırıb. “Türkiyə prezidentini Şuşada bütün Azərbaycan xalqı adından salamlayıram. Bu gün müttəfiqlik haqqında imzalanmış birgə Bəyannamə əlaqələrimizi ən yüksək zirvəyə qaldırır. Bəyannamənin adı öz-özlüyündə hər şeyi deyir”, deyə Əliyev qeyd edib. 

İmzalanmış sənəddə Qars müqaviləsinə istinad edilib və bu sənəd bizim gələcəyə dair siyasətimizi müəyyən edir. Sənəddə ikitərəfli münasibətlərin bütün aspektləri, xüsusən, müdafiə sənayesi və qarşılıqlı hərbi yardım sahəsi ilə bağlı məsələlər əksini tapıb.

Bu, bizim həmişə birlikdə olacağımızı və bir-birimizin təhlükəsizliyini qoruyacağımızı göstərir, deyə Əliyev vurğulayıb.

İkinci məqam Zəngəzur dəhlizinin açılması ilə bağlı bəndlərdir, bu da imzalanmış sənəddə əksini tapıb və bu məsələyə verilən əhəmiyyəti göstərir, deyə Əliyev bildirib.

İkinci Qarabağ müharibəsinin ilk saatlarındanca Türkiyə rəhbərliyi açıq-aşkar Azərbaycanı müdafiə edib, bu da müharibəyə xarici müdaxilənin qarşısını alıb. Bütün bunlar Azərbaycana güc və əminlik verib. “Biz bu dəstəyi heç vaxt unutmayacağıq”, deyə dövlət başçısı qeyd edib. -02B-