Əli Kərimli

Əli Kərimli

Bakı/19.02.22/Turan: Azərbaycan Xalq Cəbhəsi Partiyasının sədri Əli Kərimli bəyanatla çıxış edərək müstəqil və nüfuzlu mənbələrə istinadən bildirib ki, hökumət növbəti dəfə saxta "dövlət çevrilişi" şousu hazırlayır.

“Əlbəttə ki, məqsəd günü-gündən haqqını tələb edən xalqı və onun əsas təmsilçisi olan müxalifəti repressiyaya məruz qoymaqdır. Şərti olaraq “Azərbaycan üçün Qazaxıstan ssenarisi” adlanan plana görə, sosial narazılıq zəminində hansısa etirazların hakimiyyətin öz xəfiyyələri vasitəsilə zorakı iğtişaşa çevrilməsi və həmin zorakı iğtişaşa görə sadə insanların və müxalifətin kütləvi repressiyaya məruz qoyulması nəzərdə tutulur”, - Kərimli yazır.

O qeyd edir ki, hakimiyyət ideoloqları gələcək planı hazırlamaq üçün artıq piar kampaniyasına da başlayıb. Artıq hakimiyyətə yaxın mətbuat və “müxalifətçi” adı altında gizlənmiş hökumət yandaşları Milli Şura və Azərbaycan Xalq Cəbhəsi Partiyasının “növbəti dəfə” rəngli inqilaba hazırlaşdığını yazmağa başlayıblar.

Kərimlinin sözlərinə görə, budəfəki “rəngli inqilab”ı hansı xarici ölkəyə bağlamaqla bağlı hakimiyyət daxilində hələ də son qərar verilməyib. Hakimiyyətyönlü KİV və “cib müxalifətçiləri” ABŞ və Qərb fondlarına işarə edirlər, eyni zamanda Demokratik Qüvvələrin Milli Şurasını və Azərbaycan Xalq Cəbhəsi Partiyasını Putin Rusiyası ilə əlaqələndirməyə çalışırlar.

“Mən rəsmən bəyan edirəm ki, hökumət mətbuatının və yandaşlarının Milli Şura və Azərbaycan Xalq Cəbhəsi Partiyasına qarşı irəli sürdüyü iddialar ağ yalan və iyrənc iftiradır, müxalifəti şərləmək cəhdidir. Hakimiyyətdən tələb edirik ki, bu cinayətkar niyyətdən imtina etsin”, -Kərimli yazır.

O, hökumətin dəyişməsinin tərəfdarı olduğunu gizlətmir: “Bu hakimiyyətə qarşı müxtəlif tələblərlə mitinqlər etmişik və pandemiyadan sonra yenə də təşkil edəcəyik. Ancaq biz hakimiyyəti istisnasız olaraq dinc, konstitusion yolla, seçki ilə dəyişmək istəyirik və bir az tez, bir az gec xalqımız öz məqsədinə nail olacaq. Azərbaycanda da avtoritarizmə, ailə hakimiyyətinə, saxta seçkilərə son qoyulacaq. Xalq öz hakimiyyətini özü seçəcək və dəyişə biləcək. Hakimiyyətin heç bir təxribatı, məkrli planı onun labüd məğlubiyyətinin qarşısını ala bilməyəcək”.

Əli Kərimli qeyd edir ki, ölkədə sosial gərginlik nəinki hər ay, hər həftə, hər gün artır. Xalqın mütləq əksəriyyəti ölkədə təkbaşına iqarəçiliyin dayandırılmasını, azad, ədalətli seçkilərin keçirilməsini, hüquq və azadlıqların, hüququn aliliyinin, hakimiyyət bölgüsünün təmin edilməsini istəyir: “Onlar ölkənin gələcəyini qardaş Türkiyə ilə ittifaqı dərinləşdirməklə demokratik ölkələrin birliyi olan Avropa İttifaqına, Avroatlantik məkana inteqrasiyada görür”.0-

 

Rəy yaz

Siyasət

Taksi sayı azaldılır, bəs köhnə taksiçilər nə ilə dolanacaqlar? – Rauf Ağamirzəyev Çətin sualda



Bizi sosial şəbəkələrdə izləyin

Xəbər lenti