Azərbaycan Xarici İşlər Nazirliyi: Beynəlxalq Qızıl Xaç Komitəsi Laçın yolundan ancaq tibbi məqsədlərlə daşımalar üçün istifadə edə bilər

Bakı/14.07.23/Turan: Azərbaycan Beynəlxalq Qızıl Xaç Komitəsinin  nəqliyyat vasitələrini  tibbi məqsədlərlə yenidən Laçın yolu buraxmağa hazırdır. Azərbaycan Qarabağın erməni əhalisinin digər ehtiyaclarını təmin etmək üçün Beynəlxalq Qızıl Xaç Komitəsinə  Ağdam-Xankəndi yolundan istifadəni təklif edir.

14 iyul 2023-cü il tarixində Azərbaycan Respublikasının xarici işlər naziri Ceyhun Bayramov Beynəlxalq Qızıl Xaç Komitəsinin Azərbaycandakı nümayəndəliyinin rəhbəri Draqana Kojiçlə görüşüb.

Görüş zamanı Azərbaycanla Beynəlxalq Qızıl Xaç Komitəsi arasında əməkdaşlıq məsələləri, Laçın sərhəd buraxılış məntəqəsində yaranmış son vəziyyət, habelə təşkilatın Azərbaycanın Xankəndi şəhərində fəaliyyəti məsələləri müzakirə olunub.

Bayramov Laçın sərhəd buraxılış məntəqəsinin fəaliyyətilə bağlı yaranmış son vəziyyətlə əlaqədar bildirib ki, 15 iyun tarixində məntəqənin atəşə tutulması ilə yanaşı, erməni sürücülərin Beynəlxalq Qızıl Xaç Komitəsinə məxsus nəqliyyat vasitələrində qaçaqmalçılıq məhsullarını Azərbaycana gətirmək səyləri Ermənistan tərəfinin Azərbaycanın suverenliyinə müdaxilə edən cəhdlərdən və qeyri-qanuni fəaliyyətlərdən əl çəkmək niyyətinin olmadığını göstərir, Azərbaycan Xarici İşlər Nazirliyinin  məlumatında deyilir.  

Bayramov xatırladıb ki, təşkilat 11 iyul tarixli bəyanatında bəyan edilməmiş malların daşınması fəaliyyətini dəstəkləmədiyini bildirib.

“Həmçinin belə yükləri daşıyan nəqliyyat vasitələrinin sürücülərinin xidməti müqavilələrinə xitam verilməsinin qeydə alındığı və təqdirəlayiq olduğu bildirilib. Gələcəkdə bu kimi halların qarşısının alınmasının zəruri olduğu vurğulanıb”, - məlumatda qeyd olunub.  

Müzakirələr zamanı Bayramov  zəruri qaydalara riayət etməklə, təşkilat vasitəsilə erməni sakinlərin tibbi məqsədləri üçün sərhəd məntəqəsindən keçidin davam etməsinin mümkünlüyünü bildirib. “Erməni sakinlərin tədarük ehtiyaclarına gəlincə, Azərbaycan tərəfinin Ağdam-Xankəndi yolundan istifadə etməklə yardım göstərmək imkanının mövcud olduğu bir daha xatırlanıb”, - Azərbaycan Xarici İşlər Nazirliyinin  məlumatında deyilir.  

Azərbaycan Dövlət Sərhəd Xidməti Qızıl Xaç maşınları ilə qaçaqmalçılıq mallarının daşınması ilə əlaqədar araşdırma aparmaq üçün iyulun 11-də "Laçın" buraxılış məntəqəsini bağlayıb.

Qızıl Xaç bildirib ki, erməni sürücülər təşkilatın xəbəri olmadan kommersiya təyinatlı malları daşımağa cəhd ediblər. Bu sürücülərlə müqavilələrin ləğv olunduğunu bildirən Beynəlxalq Qızıl Xaç Komitəsi humanitar daşımaların davam etdirilməsinin vacibliyini vurğulayıb. 06B