Azərbaycan Xarici İşlər Nazirliyi Birləşmiş Millətlər Təşkilatı Fondunu öz mandatından kənara çıxmamağa çağırıb

Bakı/25.01.23/Turan:  Azərbaycan Xarici İşlər Nazirliyi Birləşmiş Millətlər Təşkilatı Əhali Fondunun Laçın yolu ətrafındakı vəziyyətlə bağlı bəyanatından təəssüf və təəccübləndiyini bildirib.

“Ermənistanın Azərbaycana qarşı hərbi təcavüzü nəticəsində 30 il ərzində öz evlərindən didərgin düşmüş, illərlə çadır şəhərciklərində, atılmış qatar vaqonlarında, düşərgələrdə heç bir sağlamlıq şəraiti olmayan mühitdə yaşamış, təhsil, səhiyyə və bütün digər hüquqlardan məhrum olmuş yüz minlərlə azərbaycanlı ailənin acınaqcaqlı vəziyyətinə münasibət bildirməyən Birləşmiş Millətlər Təşkilatı Əhali Fondunun azərbaycanlıların legitim etirazlarına dair bəyanat verməsi qəbuledilməzdir”, -  Xarici İşlər Nazirliyinin şərhində deyilir.

Azərbaycanın təbii sərvətlərinin Ermənistana daşınması və yalnız humanitar məqsədlər üçün nəzərdə tutulmuş Laçın yolundan sui-istifadə hallarının qarşısının alınması tələbilə Azərbaycanın suveren ərazisi olan Laçın yolunda keçirilən dinc etirazlar Azərbaycan xalqının legitim hüququdur.

Erməni sakinlərin kompakt yaşadığı Azərbaycan ərazilərində qeyri-qanuni fəaliyyətlər Azərbaycanın milli təhlükəsizliyinə hədədir və belə qanunsuz fəaliyyətlərə son qoyulması zəruridir.

“2020-ci il 10 noyabr tarixli üçtərəfli bəyanata uyğun olaraq, Azərbaycan Laçın dəhlizi üzrə hər iki istiqamətdə vətəndaşların, nəqliyyat vasitələrinin və yüklərin hərəkətinə təhlükəsizlik zəmanəti verir. Təhlükəsizlik zəmanəti həmçinin Laçın yolundan sui-istifadənin qarşısının alınmasını ehtiva edir”, - Xarici İşlər Nazirliyi xatırladıb.

Laçın yolunda nəqliyyat vasitələrinin və sakinlərin hərəkətinə etirazçılar tərəfindən heç bir maneə tətbiq edilməyib və etirazların bölgədə “humanitar fəlakət” yaratdığı barədə iddialar əsassızdır.

So ayda yoldan 1000-dən artıq nəqliyyat vasitələri keçib və sakinlər gündəlik tədarük malları, tibbi ləvazimatlar və zəruri tibbi xidmətlərlə təmin olunub.

“Azərbaycan hökuməti həmçinin erməni sakinlərin üzləşə biləcəyi bütün humanitar ehtiyacları operativ şəkildə həll etməyə hazır olduğunu dəfələrlə bəyan edib. Bütün bunlara baxmayaraq, özlərini erməni sakinlərin “liderləri” kimi təqdim edən şəxslər öz qanunsuz fəaliyyətlərini davam etdirmək məqsədilə yerli əhalidən sipər kimi istifadə etməkdə davam edir və onların hərəkət azadlığına mane olurlar”, - Azərbaycan Xarici İşlər Nazirliyinin şərhində deyilir.  

Sonda rəsmi Bakı  Birləşmiş Millətlər Təşkilatının Əhali Fondunu qərəzsiz olmağa,  təşkilatın nüfuzuna xələl gətirəcək hərəkətlərdən və açıqlamalardan çəkinməyə çağırır. 03D06