Azərbaycan XİN: Ermənistan sülh prosesini pozur

Bakı/26.07.19/Turan: Azərbaycanın işğal olunmuş ərazilərində "cənub istiqaməti" adlandırılan yeni yolun çəkilməsi ilə bağlı Ermənistanın yüksək vəzifəli nümayəndəsinin bəyanatı Ermənistanın əsl niyyətinin hərbi işğala əsaslanan mövcud status-kvonu möhkəmləndirmək, münaqişənin danışıqlar yolu ilə həllinə imkan verməmək və Azərbaycanın işğal olunmuş ərazilərini ilhaq etmək olduğunun növbəti nümunəsidir. Bu barədə Ermənistan XİN -in bu ölkədən Qarabağın cənubuna yeni yolun çəkilməsilə bağlı planları ilə əlaqədar Azərbaycan XİN-in bəyanatında deyilir.

Bəyanatda qeyd olunur ki, Ermənistan tərəfindən Azərbaycanın işğal olunmuş ərazilərində həyata keçirilən qeyri-qanuni fəaliyyətlər, o cümlədən infrastruktur dəyişikliyinin aparılması Ermənistanın münaqişənin sülh yolu ilə həll edilməsi barədə iddialarının riyakarlıqdan və beynəlxalq ictimaiyyəti aldatmaqdan başqa bir şey olmadığını göstərir.

Sənəddə qeyd olunur ki, "şimal istiqaməti2 adlandırılan və işğal olunmuş Kəlbəcər rayonundan çəkilmiş "Vardenis-Ağdarə" avtomobil yolu, eləcə də mərkəzi "Gorus-Laçın" avtomobil yolu təcrübəsi göstərir ki, Qubadlı və Cəbrayıl rayonlarından çəkilməsi nəzərdə tutulan yeni yol işğal altında olan bu ərazilərin təbii və digər resurslarının daha aqressiv formada talan edilməsinə xidmət edəcək.

Ermənistan Azərbaycanın işğal olunmuş ərazilərində infrastruktur dəyişikliyi ilə bərabər maddi-mədəni irsin məhv edilməsi, demoqrafik tərkibin dəyişdirilməsi, mineral resursların talan edilməsi və digər bu kimi qeyri-qanuni fəaliyyətlər həyata keçirir.

ATƏT-in Minsk Qrupunun həmsədrləri tərəfindən Azərbaycanın işğal olunmuş ərazilərində aparılmış fakt-araşdırıcı və qiymətləndirmə missiyalarının nəticəsi olaraq hazırlanmış hesabatlarda qeyri-qanuni fəaliyyətlərin sülh prosesinə ciddi təhlükə yaratdığı təsbit olunur.

2018-ci ildə hazırlanmış "Azərbaycanın Ermənistanın işğal altında olan ərazilərində qeyri-qanuni fəaliyyətlər: Peyk məlumatları əsasında sübutlar" adlı hesabatda Ermənistanın qeyri-qanuni əməllərinin miqyası tam aydın şəkildə özünü göstərir.

Beynəlxalq humanitar hüquq, xüsusilə 1949-cu il tarixli Cenevrə Konvensiyası və əlavə protokollar işğal olunmuş ərazilərdə qanunsuz fəaliyyətlərin aparılmasını qadağan edir.

Azərbaycan XİN ATƏT-in Minsk Qrupu həmsədrlərini və ATƏT-in fəaliyyətdə olan sədrinin şəxsi nümayəndəsini işğal olunmuş ərazilərimizdə aparılan və danışıqlar prosesinə ciddi zərbə vuran qeyri-qanuni fəaliyyətləri ciddi şəkildə nəzərə almağa çağırıb.

Münaqişənin həlli ilə bağlı münbit şəraitin yaradılmasına baxmayaraq, Ermənistanın atəşkəs rejiminin arxasında gizlənərək destruktiv şəkildə qeyri-qanuni fəaliyyətləri davam etdirməsi danışıqlar prosesinin pozulmasına yönəlmiş növbəti təxribatçı cəhddir. Buna görə bütün məsuliyyət Ermənistanın siyasi-hərbi rəhbərliyinin üzərinə düşür.

Azərbaycan Ermənistandan bölgədə sülh, təhlükəsizlik və rifaha qarşı yönələn əməllərinə son verməyi, işğalçı qüvvələrini Azərbaycanın işğal edilmiş ərazilərindən çıxarmağı tələb edib.

"Azərbaycan işğalçı ölkənin bu kimi təxribatçı əməllərinə müvafiq şəkildə cavab vermək hüququnu özündə saxlayır", - Azərbaycan XİN-im bəyanatında deyilir.

Bundan öncə Ermənistan Təhlükəsizlik Şurasının katibi Armen Qriqoryan "Azadlıq" radiosunun Ermənistan redaksiyasına müsahibəsində bildirib ki, ölkə hökuməti 2020-ci ild Qapandan Hadruta (müasir inzibati bölgüdə Azərbaycanın Xocavənd rayonu) 150 kilometrlik yol çəkməyi planlaşdırır. 06D-