Azərbaycan XİN YUNESKO-nu Qarabağda mədəniyyət abidələrilə bağlı vəziyyəti siyasiləşdirməməyə çağırıb

Bakı/22.12.20/Turan: Azərbaycan YUNESKO-nu öz missiyasını müstəqil və obyektiv yerinə yetirməyə, mədəni irsin qorunması məsələsinin siyasiləşdirilməsinə yol verməməyə çağırıb. Bu barədə YUNESKO-nun Azərbaycana missiyasının göndərilməsi ilə bağlı bu qurumun çağırışına cavab olaraq Azərbaycan XİN-in bəyanatında deyilir.

“Azərbaycan YUNESKO ilə əməkdaşlığa, qoşulduğu konvensiyalardan irəli gələn vəzifələrin icrasına, xüsusilə də mədəni irsin qorunması ilə bağlı öhdəliklərinə hər zaman sadiqlik nümayiş etdirib”, - XİN-in bəyanatında deyilir.

“Lakin təəssüflə qeyd etmək lazımdır ki, 30 il ərzində Ermənistanın Azərbaycana qarşı hərbi təcavüzü və torpaqlarımızın işğalı zamanı mədəni irsimizin dağıdılması, mənimsənilməsi, mahiyyətinin dəyişdirilməsi, mədəni sərvətlərin ökəmizdən qeyri-qanuni çıxarılması kimi hərbi cinayətlərin araşdırılması məqsədilə YUNESKO-ya çağırışlarımıza laqeyd yanaşılıb və bu məsələ ilə bağlı YUNESKO Katibliyi qətiyyətlilik nümayiş etdirməyib"-, bəyanatda bildirilir.

Qeyd edək ki, bundan öncə YUNESKO Bakını təşkilatın əhəmiyyətli mədəni dəyərlərin inventarlaşdırılması üzrə missiyasını Qarabağ münaqişəsi zonasına buraxmağa çağırıb ki, ATƏT-in Minsk Qrupu da bunu dəstəkləyib.

“Hələlik yalnız Azərbaycanın cavabının olması gözlənilir ki, YUNESKO yerlərdə missiyanın istiqaməti ilə bağlı işi davam etdirə bilsin. Bu mərhələdə Azərbaycan hakimiyyətindən dəfələrlə xahişlər uğurla nəticələnməyib.

"Biz son bir neçə həftə ərzində aparılan konstruktiv müzakirələri həyata keçirə bilmək üçün Bakının dərhal reaksiya verəcəyini gözləyirik”, - YUNESKO bbaş direktorunun müavini Ernesto Ottone bildirib. -02D-