Azərbaycanda İtaliya şirkətlərinə “yaşıl işıq”

Bakı/03.02.21/Turan: Bu gün Azərbaycan prezidenti İlham Əliyev İtaliyanın Maire Tecnimont Group şirkətinin sədri Group Fabrizio Di Amatonun başçılıq etdiyi nümayəndə heyətini videoformatda qəbul edib.

Di Amatonun sözlərinə görə, bu şirkət 7 ildən çoxdur Azərbaycanda fəaliyyət göstərir. “Biz ölkənizin sənayeləşdirilməsi işinə töhfəmizi veririk”, deyən şirkət sədri Azərbaycanda fəaliyyəti genişləndirmək əzmində olduqlarını qeyd edib.

Əliyev öz növbəsində qeyd edib ki, Maire Tecnimont Group-un fəaliyyəti və onun həyata keçirdiyi layihələr qeyri-neft sektorunu inkişaf etdirməyə kömək edir. Ötən il pandemiyaya və iqtisadi azalmaya baxmayaraq, bu sektor 12,5% artıb.

Əliyev məmnuniyyətlə qeyd edib ki, İtaliya şirkəti Azərbaycanda dəyəri 1,6 milyard avrodan çox olan layihələrdə iştirak edir. İtaliya və Azərbaycan arasında münasibətlərin uğurla inkişaf etdiyini qeyd edən Əliyev İtaliya KİV-lərinin Qarabağ müharibəsini obyektiv işıqlandırdığını vurğulayıb.

“İtaliya və Azərbaycan strateji tərəfdaşlardır. Strateji tərəfdaşlıq haqqında sənəd imzalanıb və reallıq da bizim strateji tərəfdaş olduğumuzu göstərir”, deyə Əliyev qeyd edib.

O, İtaliya şirkətlərinin azad edilmiş ərazilərin bərpası ilə bağlı layihələrdə çox fəal olacağına ümid etdiyini bildirib. Bir neçə İtaliya şirkəti artıq bərpa və tikinti işlərinə cəlb edilib. “Əminəm ki, onların sayı daha da artacaq. Çünki mən artıq dəfələrlə çıxışlarımda demişəm və bir daha qeyd etmək istəyirəm ki, biz yalnız dost ölkələrdən olan şirkətləri dəvət edəcəyik”, deyə Əliyev bildirib.

Əliyev həmçinin Bakıda İtaliya-Azərbaycan universitetinin yaradılması haqqında qərara toxunub. “Biz artıq yer ayırmışıq. Artıq universitetin yaradılması ilə bağlı məsələ üzərində işlər başlayıb. Bu məsələ, həmçinin hökumət səviyyəsində razılaşdırılmışdır. Ümid edirəm ki, gərgin çalışsaq bu il biz bu işə başlaya bilərik”, deyə Əliyev qeyd edib. 

Öz növbəsində, şirkətin baş direktoru Pierroberto Folgiero qeyd edib ki, SOCAR ilə kimya sahəsində əməkdaşlıq aparılır. Bu işbirliyi universitetin fəaliyyətə başlamasını nəzərdə tutacaq. Şirkət həmçinin “yaşıl kimyanın” inkişafı texnologiyalarını Azərbaycanla bölüşməyə hazırdır.

* Maire Tecnimont 2015-ci ildə SOCAR tərəfindən Sumqayıtda polipropilen istehsalı zavodunun tikintisi layihəsinin baş podratçısı qismində cəlb edilib. Şirkət həmçinin Bakı Neft Emalı Zavodunun yenidənqurma və müasirləşdirilməsi layihəsində iştirak edir. -06В-