Azərbaycanın ABŞ-dakı səfirliyi azərbaycanlılara ehtiyatlı olmağa çağırır

Bakı/23.07.20/Turan: Azərbaycanın ABŞ-dakı səfirliyi bu ölkədə olan Azərbaycan vətəndaşlarını ehtiyatlı olmağa çağırıb.

“Erməni radikalların zorakı addımlarının və təxribatlarının sayı və dərəcəsinin artdığını nəzərə alaraq, həmvətənlərimizə bir daha ehtiyatlı və tədbirli, erməni radikalların zorakılıq meylindən agah olmağa, hər hansı bir zorakılıq, təhdid və ya təhlükə olduqda dərhal yerli hüquq-mühafizə orqanlarına müraciət etməyə tövsiyə edirik”, - Azərbaycanın Vaşinqtondakı səfirliyinin məlumatında bildirilir.

Həmçinin azərbaycanlılara  hər hansı bir aksiya və ya tədbirdə iştirak edərkən yerli hüquq-mühafizə orqanları ilə əlaqələndirmə həyata keçirmək və təhlükəsizliyin tam şəkildə təmininə əmin olmaq tövsiyə edilir. 

Azərbaycan vətəndaşları rastlaşdıqları zorakılıq və təhdid halları üzrə mümkün konsulluq yardımı almaq üçün Vaşinqtonda səfirliyə və Los Ancelesdə Baş Konsulluğa müraciət etməlidirlər.

Səfirliyin “qaynar xətt”i: (+1) 202-560-3583.

Son günlər dünyanın müxtəlif yerlərində, o cümlədən ABŞ-da radikal ermənilərin Azərbaycanın diplomatik missiyaları da daxil olmaqla azərbaycanlılara qarşı müxtəlif kriminalyönlü zorakı fəaliyyətləri artıb. 

Əsasən erməni radikallardan ibarət dəstələr Los-Ancelesdə Azərbaycanın diplomatik missiyası qarşısında azərbaycanlıların dinc aksiyasının iştirakçılarına hücum edib, nəticədə 7 nəfər azərbaycanlı zərər çəkib.-0-