Azərbaycanın qlobal əhəmiyyətli aqrar əraziləri

Bakı/05.02.21/Turan: Azərbaycanın şimal-qərb regionunda üç ərazi Qlobal Əhəmiyyətli Aqrar İrs (GİAHS) kimi qeydə alınacaq. Bu barədə Avropa İttifaqının Azərbaycandakı nümayəndəliyinin məlumatında deyilir.

Avropa İttifaqının maliyyə dəstəyi ilə BMT-nin Ərzaq və Kənd Təsərrüfatı Təşkilatının (FAO) həyata keçirdiyi “Azərbaycanın Şimal-Qərb bölgəsində dayanıqlı və inklüziv yerli kənd təsərrüfatı və qida sistemlərinin inkişaf etdirilməsi” layihəsi çərçivəsində bölgədə GIAHS tələblərinə cavab verən məntəqələr seçiləcək.

GIAHS ərazisi kimi qeydə alınmaq bölgənin hazırki və gələcək qida təhlükəsizliyi, əhalinin dolanışıq vəziyyətinin təminatı, eləcə də digər iqtisadi və ətraf mühit məhsul və xidmətlərinin inkişafı üçün böyük əhəmiyyətə malikdir.

Zaqatala, Qax, Balakən rayonlarını əhatə edən layihənin əsas məqsədi kiçik kənd təsərrüfatı sahibkarlığını dəstəkləyən dəyər zəncirlərinin formalaşdırılması və ərazidə yoxsulluğun aradan qaldırılmasına töhfə verməkdir.

Bölgənin aqrar turizm potensialının inkişafı da Layihənin hədəfindədir.

Bölgədə seçilmiş ərazilərin GIAHS kimi qeydiyyata düşməsi nəinki həmin məkanların, ümumilikdə Azərbaycanın xarici turistlərə tanıdılması üçün əhəmiyyətli addım olacaq.

Hazırda dünya üzrə 22 ölkədən 62 GIAHS ərazisi qeydiyyata alınıb. 71D--