Bakı və Brüsselin yaxınlaşması haqqında proqnozlar nə dərəcədə ədalətlidir?

Bakı/05.06.18/Turan: Azərbaycanın Avropa İttifaqı ilə tərəfdaşlıq sazişi imzalaması ilə bağlı danışıqlar hələlik əhəmiyyətli nəticə verməyib. Bu barədə Turan agentliyinə Brüsseldə vəziyyətdən xəbərdar olan məlumatlı diplomatik mənbə bildirib.

Bakı nümayəndələri siyasi və iqtisadi blokla bağlı məsələlərin həllini hər yolla ləngidir və Qarabağ münaqişəsi haqqında danışıqlar məsələsini hər bəhanə ilə gündəliyə salmağa çalışır, deyə mənbə qeyd edib.

Yalnız humanitar əməkdaşlıq haqqında məsələlər bloku ilə bağlı müəyyən irəliləyiş var.

"Buna görə danışıqların uğurla irəlilədiyi və tezliklə saziş imzalanacağı haqqında bəyanatlar əsassızdır", deyə mənbə qeyd edib.

Xatırladaq ki, bir neçə il əvvəl rəsmi Bakı bildirib ki, "Şərq Tərəfdaşlığı" proqramı çərçivəsində Avropa İttifaqı ilə əməkdaşlıq onu qane etmir və Azərbaycan Avropa İttifaqı ilə əməkdaşlığın bütün aspektlərini müəyyən edən ayrıca sazişi olmasını istəyir.

Bu məsələ ilə bağlı danışıqlar bir neçə ildir aparılır, amma təcrübi nəticə yoxdur.

Eyni zamanda, Ermənistan tərəfi ilə bu məsələ ilə bağlı danışıqlar cəmi il yarım aparılıb və tərəfdaşlıq sazişinin imzalanması ilə uğurla başa çatıb.

"Bakının Rusiya ilə əməkdaşlığa Avropa İttifaqından daha çox meylli olduğu haqqında fikir var. Bakıda başa düşürlər ki, Ermənistanda hakimiyyət dəyişdikdən sonra Yerevan mütləq Avropa İttifaqı ilə yaxınlaşacaq. Buna görə Bakı Moskvanın Yerevanın davranışından narazılığı üzərinə oynamaq istəyir", deyə mənbə bildirib. -71B-