Bakı və Moskva noyabrın 9-da Rusiyanın vurulmuş helikopteri haqqında işin təfsilatını dəqiqləşdirəcək

Bakı/22.01.21/Turan: Bakı Rusiyanın vurulmuş Mi-24 helikopteri haqqında işlə bağlı Moskvaya hüquqi yardım göstərilməsi haqqında vəsatət göndərib, bu barədə RİA-Novosti-yə Azərbaycan Baş Prokurorluğunun mətbuat xidmətindən bildiriblər.

“Hazırda bu iş üzrə intensiv istintaq-əməliyyat tədbirləri aparılır. Vəsatətin nəticələrinə görə bu cinayət işi üzrə qanuni qərarın qəbul edilməsi təmin ediləcək”, deyə mətbuat xidmətindən bildiriblər.

Xatırladaq ki, 2020-ci il noyabrın 9-da Azərbaycan SQ Ermənistanla sərhəddə Mi-24-ü vurub. Nəticədə iki ekipaj üzvü həlak olub. Bakı Rusiyaya məxsus helikopterin təsadüfən vurulduğunu etiraf edib, üzr istəyib və Rusiyaya təzminat ödəməyə hazır olduğunu bildirib. Azərbaycan Baş Prokurorluğu “qulluğa səhlənkar yanaşma” maddəsi ilə cinayət işi açıb.

Azərbaycan tərəfin məlumatına görə, helikopter gecə saatlarında aşağı yüksəklikdə, Naxçıvan yaxınlığında, Azərbaycan sərhədindən 150 metr məsafədə uçurdu. Azərbaycan hərbiçisi helikopterin Ermənistana məxsus olduğunu düşünərək, onu daşınan raket kompleksi ilə vurub. Növbəti gün Azərbaycan XİN bildirib ki, helikopter sərhədin bilavasitə yaxınlığında uçurdu və radarlarda görünmürdü.

Öz növbəsində, Rusiya tərəfi uçuş qaydalarının pozulması maddəsi ilə cinayət işi açıb. Bu, Rusiya hərbiçilərinin də müəyyən dərəcədə təqsiri olduğunu göstərir. Sonradan Rusiya tərəfi maddəni “qəsdən adam öldürmə”yə tövsif edib və təqsirkarların Rusiya ərazisində olmamasının istintaqı çətinləşdirdiyini və Azərbaycana müvafiq sorğu göndərildiyini bildirib. -02D-