Belarus prezidentinin Azərbaycana rəsmi səfəri

Bakı/12.04.21/Turan: Aprelin 13-də Belarus prezidenti Aleksandr Lukaşenko Bakıya ikigünlük rəsmi səfərə gələcək, bu barədə Belarus liderinin mətbuat xidməti məlumat yayıb.

Səfər proqramına Azərbaycan prezidenti İlham Əliyevlə iki görüş daxildir. Bir görüş Belarus lideri Bakıya gəldikdən dərhal sonra baş tutacaq. “Qeyri-rəsmi şəraitdə dölvət başçıları Belarus-Azərbaycan münasibətlərinin əsas istiqamətlərini və ikitərəfli əməkdaşlığın strateji məsələlərini müzakirə edəcəklər”, deyə məlumatda bildirilir.

Danışıqların rəsmi hissəsi çərşənbə gününə planlaşdırılıb. Prezidentlərin görüşü təkbətək və nümayəndə heyətlərinin iştirakı ilə geniş tərkibdə keçiriləcək. Əsas diqqət qarşılıqlı ticari-iqtisadi fəaliyyətin genişləndirilməsinə və əməkdaşlığa yeni məzmun əlavə edilməsinə yönəldiləcək.

“Tərəflər sənaye kooperasiyası, ərzaq məhsullarının istehsalı və tədarükü sahəsində cari və gələcək layihələrin həyata keçirilməsi, kənd təsərrüfatı məhsullarının emalı məsələlərinə baxacaqlar. Səhiyyə sahəsində, elmi-texniki sahədə, təhsil və turizm sahələrində əməkdaşlıq məsələlərinə də toxunulacaq.

Dövlət başçıları həmçinin beynəlxalq gündəliyin aktual məsələləri ilə bağlı fikir mübadiləsi aparacaqlar.

Danışıqların yekunlarına görə ikitərəfli sənədlərin imzalanması nəzərdə tutulur”, deyə məlumatda qeyd edilir. -16D-