Beynəlxalq İnsan Hüquqları Günü münasibətilə qəbul

Bakı/10.12.22/Turan: Dekabrın 9-da ABŞ, Böyük Britaniya və Avropa İttifaqının Bakıdakı səfirlikləri hər il dekabrın 10-da qeyd olunan Beynəlxalq İnsan Hüquqları Günü münasibətilə qəbul təşkil ediblər.

Avropa İttifaqının səfiri Peter Mixalko insan hüquqlarının, fundamental azadlıqların, bərabərlik və azlıqların hüquqlarının qlobal əhəmiyyətindən, demokratik cəmiyyətin əsasları kimi şəxsi həyatın toxunulmazlığının qorunmasından, insan hüquqları strukturlarının və vətəndaş cəmiyyətinin bunda oynadığı roldan danışıb.

Bu il Rusiyanın Ukraynaya təcavüzü və dinc ukraynalıların iztirabları səbəbindən insan hüquqlarının kütləvi şəkildə pozulması fonunda hüquqlar məsələsi xüsusi əhəmiyyət kəsb edib.

O, çətin şəraitdə demokratik dəyərlərin qorunmasında və insan haqları uğrunda mübarizədə gərgin əməyinə görə Azərbaycanın hüquq müdafiəçilərinə təşəkkür edib.

Mixalko Azərbaycanda tanınmış fəal və hüquq müdafiəçisi Bəxtiyar Hacıyevin məhz İnsan Hüquqları Günündə həbs olunmasından təəssüfləndiyini bildirib.

“Tanınmış fəalın belə münasibətin obyektinə çevrilməsi çox narahatedici faktdır”,  - o vurğulayıb.

Böyük Britaniyanın Azərbaycandakı səfirinin müavini Filip Barklay Azərbaycan dilində çıxışı ilə iştirakçıları təəccübləndirib. O, insan hüquqlarının daim diqqət mərkəzində olduğunu qeyd edib.

O, Ukraynadakı vəziyyətə toxunaraq deyib ki, “Putin rejiminin mülki şəxslərə hücumları dəhşətlidir”. Britaniya bu hücumlara görə məsuliyyət daşıyanlara qarşı tədbir görəcək.

O, Azərbaycana toxunaraq xatırladıb ki, ötən il siyasətçi Tofiq Yaqublunun həbsi, indi isə Bəxtiyar Hacıyevin həbsi, jurnalist Aytyan Məmmədovaya hücum, jurnalist Əvəz Hafizli və digər LGBT  nümayəndələrinin ölümü kimi “narahatedici” faktlar baş verib.

“Bu hadisələr göstərdi ki, hüquqlara hörmətlə yanaşılmasına  və hüquqların təmin edilməsinə daha çox ehtiyac var”, - diplomat deyib.

O, öz ölkəsinin hökumətinin işğaldan azad edilmiş ərazilərin minalardan təmizlənməsi məsələsində Azərbaycan hakimiyyətilə əməkdaşlığa hazır olduğunu bildirib.

ABŞ-ın Azərbaycandakı səfirinin səlahiyyətlərini icra edən Huqo Gevara hüquq və azadlıqların dəyərinin lap əvvəldən Amerika demokratiyasının əsasını təşkil etdiyini xatırladıb.

Şəxsiyyətlərin, azlıqların azadlığının təminatı hər zaman  dəyər olub və olaraq qalır. Praktikada bu, həmin hüquqların təmin edilməsi üçün mübarizə aparmaq, müdafiə olunmayan vətəndaş qruplarına hücumların qarşısını almaq deməkdir.

O bu çətin işə görə Azərbaycanın hüquq müdafiəçilərini və vətəndaş cəmiyyəti fəallarını alqışlayıb. “Bu səbəbdən biz Bəxtiyar Hacıyevin həbsi barədə bugünkü məlumatdan çox narahatıq”, - Gevara deyib və prezident Baydenin sözlərini xatırladıb ki, ABŞ hər yerdə demokratik dəyərlər və azadlıq uğrunda mübarizə aparan hüquq müdafiəçiləri, fəallar və jurnalistləri dəstəkləyəcək.02B