Blinken Çavuşoğlu ilə Türkiyənin İsveç və Finlandiyanın NATO-ya qəbuluna etirazını müzakirə edəcək

Vaşinqton/18.05.22/Turan: Çərşənbə günü Nyu-Yorkda ABŞ dövlət katibi Entoni Blinken Türkiyənin xarici işlər naziri Mövlud Çavuşoğlu ilə İsveç və Finlandiyanın NATO-ya qəbulu məsələsini müzakirə edəcək, Turan-ın Vaşinqtondakı müxbiri bildirib.

Rusiyanın işğalı qarşısında Türkiyənin Ukraynaya qətiyyətli dəstəyi Vaşinqton və Ankara arasında münasibətlərin yaxşılaşmasına kömək edib, lakin bir çox amerikalı ekspert Ərdoğan hökumətinin Putinlə əlaqələri və Ankaranın Rusiyaya qarşı sanksiyalara əməl etməkdən imtina etməsilə bağlı narazılığını gizlətmir.

Bu gün Nyu-Yorkda türkiyəli diplomat yəqin ki, Ankaranın Finlandiya və İsveçin NATO-ya daxil olmasının qarşısını almağa niyə çalışdığını aydınlaşdırmaq üçün çətin suallarla qarşılaşacaq.

Dövlət Departamentinin mətbuat katibi Ned Prays Türkiyənin Finlandiya və İsveçin qəbuluna razılıq verməsinin müqabilində ABŞ-dan nə tələb etməsilə bağlı jurnalistlərin suallarına dəqiq cavab verməyib, Türkiyə rəsmilərinin açıq bəyanatlarını təkrarlayıb.

Bazar ertəsi Ankara Finlandiya və İsveçi daha çox tənqid edərək, onları Türkiyənin terrorçu hesab etdiyi kürd yaraqlıları və digərlərini dəstəkləməkdə, həmçininTürkiyəyə hərbi texnika satmaqdan imtina etməkdə ittiham edib.

Dövlət Departamentinin məlumatına görə, Blinken və Çavuşoğlunun bugünkü görüşü Nyu-york vaxtı ilə saat 13:30-a təyin edilib. –25B-