BMT strukturu Hüseyn Abdullayevi azad etməyə çağırıb

Bakı/10.10.20/Turan: BMT-nin Əsassız həbslər üzrə İşçi Qrupu Azərbaycan hökumətini keçmiş deputat və sahibkar Hüseyn Abdullayevi azad etməyə çağırıb. Bu barədə Turan-a Abdullayevin vəkili Cavad Cavadov bildirib.

Onun sözlərinə görə, Əsassız həbslər üzrə İşçi Qrupun rəyi bu qurumun 24-28 avqust tarixlərində keçirilən 88-ci sessiyasında təsdiq edilib.

Abdullayevin Türkiyədə saxlanılması, Azərbaycana gətirilməsi, həbsi və azadlıqdan məhrumetmə cəzasına məhkum edilməsi qanunsuz hesab olunub, onun dərhal azad edilməsi zərurəti qeyd edilib.

“Hökumət bu qərara hörmətlə yanaşmalı və oktyabrın 14-də Ali Məhkəmədə Hüseyn Abdullayevin kassasiya şikayətinə baxılması zamanı onun azad edilməsi imkanından istifadə etməlidir”, deyə vəkil bildirib.

Onun sözlərinə görə, İşçi Qrupun qərarında Ümumdünya İnsan Hüquqları Bəyannaməsinə və Siyasi və Mülki Hüquqlar üzrə Beynəlxalq Pakta uyğun olaraq, Abdullayevin vəziyyətinin düzəldilməsi və hüquqlarının bərpa edilməsi zərurəti vurğulanır.

Sənədin 114-cü bəndində Abdullayevin azad edilməsi və Azərbaycan və Türkiyə hökumətlərinin ona təzminat ödəməsi zərurətindən bəhs edilir.

BMT strukturu Azərbaycan hakimiyyətini COVİD-19 pandemiyası şəraitində Abdullayevin istintaq təcridxanasında saxlanılmasının təhlükəli olmasını da nəzərə almağa çağırır.

Bundan başqa, sənəddə Azərbaycan və Türkiyə hakimiyyətlərinin Abdullayevin hüquqlarının pozulmasını araşdırması və buna görə məsul olan şəxslər barəsində tədbir görməsi zərurəti vurğulanır.

“Azərbaycan Respblikası BMT-nin Təhlükəsizlik Şurasının ərazilərimizin işğalı ilə bağlı xeyrimizə verilmiş qətnamələrinin icrasını tələb edirsə gərək özü də BMT-nin Azərbaycanda insan hüquq və azadlıqlarnın pozullmasına münasibətdə verilmiş qərarlarına hörmətlə yanaşa, onları icra edə”, deyə vəkil qeyd edib.

* Əslən Naxçıvanlı olan Hüseyn Abdullayev 1990-cı illərdə neft və neft məhsulları sahəsində biznesdə qabaqcıl mövqe tuturdu. 2005-ci ildə Abdullayev parlamentin deputatı oldu və Nazirlər Kabinetinin fəaliyyətini tənqid edirdi.

2007-ci ilin martında parlamentin iclasında hakimiyyətyönlü deputat Fəzail Ağamalı Abdullayevi davaya təhrik edib. Amma yalnız Abdullayev cəzalandırılıb. O, əvvəlcə həbs edilib, daha sonra xuliqanlığa görə 2 il şərti azadlıqdan məhrumetmə cəzasına məhkum edilib.

2013-cü ildə o, Azərbaycandan mühacirət edib. Bir müddət sonra ona qarşı vergi ittihamı ilə cinayət işi açılıb.

Almaniyada yaşayarkən Abdullayev kütləvi etirazlara çağırış yer alan bir neçə mahnı hazırlayıb və sosial şəbəkədə yayıb.

2018-ci il aprelin 22-də Abdullayev Almaniyadan gəldiyi Türkiyədə saxlanılıb və Azərbaycana ekstradisiya edilib.

Bakıda o, CM-in 192.2.2 (qanunsuz sahibkarlıq, böyük gəlir əldə etdikdə), 178.2.1 (fırıldaqçılıq), 178.2.2, 178.2.4 (fırıldaqçılıq), 182.2.1 (bir qrup şəxsin əvvəlcədən əlbir olmaqla pul tələb etməsi), 182.2.2 (eyni əməllər, təkrarən törədildikdə) və 182.2.4-cü (eyni əməllər, zərərçəkmişə böyük ziyan vurmaqla törədildikdə) maddələri ilə ittiham edilib.

Fevralın 1-də təqsirləndirilən şəxsin anası Zeynəb Abdullayeva prezident İlham Əliyevə oğluna qarşı humanizm və mərhəmət nümayiş etdirmə xahişi ilə müraciət edib. O, yaşlı olduğunu və Abdullayevin özünün səhhətində ciddi problemlər olduğunu nəzərə almağı xahiş edib.

Amma Abdullayev 6 il müddətinə azadlıqdan məhrum edilib.

İyunda Abdullayev özü Ali Məhkəmədə işinə obyektiv baxılmasını təmin etmək xahişi ilə prezidentə müraciət edib. -06D