Deputatlar: “Sülhməramlıların fəaliyyəti qanunla tənzimlənməlidir”

Bakı/16.12.20/Turan: Qarabağda Rusiya sülhməramlılarının mandatının sərbəst izahı və onların daimi "improvizasiyası" Azərbaycanda qıcıq yaradır. İlk günlərdəki təmkinli reaksiya tədricən Rusiya hərbçilərinin fəaliyyətini açıq şəkildə tənqid etməklə dəyişib. Tənqidin səviyyəsi sıravi vətəndaşlardan tutmuş Azərbaycan parlamentinin siyasi partiyalarına və deputatlarına qədər yüksəlib.

Belə ki, parlamentin üzvü Qüdrət Hüseynquliyev sülhməramlıların fəaliyyətini tənzimləyən qanunun qəbul olunmasını vacib hesab edir. Onun sözlərinə görə, beynəlxalq təcrübə var, sülhməramlılar iqtisadi və ya siyasi məsələləri həll etməli yox, birbaşa öz vəzifələrilə məşğul olmalıdırlar.

Digər deputat Aydın Mirzəzadə onunla razıdır. O sual edir ki, niyə sülhməramlılar sement və lövhələr daşıyır, Qarabağda Humanitar Mərkəz niyə və hansı əsaslarla yaradılır? Sosial-iqtisadi məsələlərin həlli Azərbaycan hakimiyyətinin preroqatividir.

Qondarma DQR bayrağı altında gəzən, Azərbaycanda barəsində cinayət işi qaldırılmış separatçıların liderləri ilə qucaqlaşan, səmimi münasibətdə olan sülhməramlı komandanlığın fəaliyyətilə bağlı Azərbaycan ictimaiyyətində çoxlu suallar var. Niyə sülhməramlılar Ermənistan Silahlı Qüvvələrinin Qarabağda bölmələrinin mövcudluğuna göz yumurlar, halbuki onlar oradan çıxarılmalıydı? Bu suallara cavab verilməlidir. Çünki əgər kimsə konservasiya prosesində

sülhməramlıların missiyasına son qoymağı və Qarabağda separatçı rejimin saxlanmasını istəyirsə, münaqişənin yenidən başlanması qaçılmazdır.-02B-