Deputatlığa müstəqil namizədlər polisə çağırılır

Bakı/06.02.20/Turan: 9 fevral növbədənkənar parlament seçkilərində bir sıra deputatlığa namizədlər polisə çağırıldıqlarını bildiriblər. Belə ki, 94 saylı Bərdə Seçki Dairəsindən namizəd Dadaş Əhmədli fevralın 5-də Bərdə polis idarəsinə çağırıldığını bildirib.

"Rəis əmr etdi ki, tərəfdarlarıma deyim, seçki prosesinə müdaxilə etməsinlər. Mən cavab verdim ki, biz özümüz qanun pozuntularının qarşısını almağa hazırıq, kimsə buna cəhd etsə, müvafiq addımları atacağıq", deyə Əhmədli bildirib.

53 saylı Quba-Qusar Seçki Dairəsindən deputatlığa namizəd Cavid Qara da rayon polis şöbəsinə çağırılıb. Amma o, bundan DİN-ə (102 xidməti) şikayət etdikdən sonra rayon polis şöbəsindən zəng edib onu heç kimin çağırmadığını deyiblər.

"Bir saat sonra mənə yenidən eyni nömrədən zəng edib gəlib-gəlməyəcəyimi soruşdular. Mən dedim ki, gəlməyəcəyəm, çünki səbəb göstərilmir. Zəng edən isə qeyri-rəsmi görüşüb söhbət etməyə israr edirdi. Mən yenidən imtina etdim", deyə Qara bildirib. O hesab edir ki, polisə çağırılması məhz seçkilərlə bağlıdır. "Digər polisə çağırılan müstəqil namizədlərə təlimat veriblər ki, seçkilərin sabahısı günü kimisə meydanlara, etirazlara səsləmək kimi söhbətlər olmasın", deyə Qara bildirib.

46 saylı Şirvan Seçki Dairəsindən deputatlığa namizəd Əlikram Xurşidov da Şirvan polis şöbəsinə çağırıldığını bildirib.  Amma o, rəsmi çağırış vərəqəsi tələb edib. "Mənə dedilər ki, təxribat törədiləcəyi barədə operativ məlumat var və mənim çağırılmağım təhlükəsizlik xarakteri daşıyır". Xurşidov polisə çağırılmasını təzyiq kimi qiymətləndirib. "Birincisi, mən indi seçicilərlə görüşlər keçirirəm və polisə çağırılmağım həm vaxtımı alır, həm də ki, seçicilərimdə qorxu yaradır. Bu, təzyiqdən başqa bir şey deyil", deyə Xurşidov bildirib.

76 saylı Lənkəran-Astara Seçki Dairəsindən deputatlığa namizəd Xalid Bağırov da Lənkəran rayon polis şöbəsinə çağırılıb. "Mən bildiriş olmadan getməkdən imtina etdim", deyən Bağırov qeyd edib ki, polisə çağırılması seçkilərlə bağlıdır. "Mən buraya 10 gün əvvəl gəlmişəm və dayanmadan seçki ilə bağlı məsələlərlə məşğulam", deyə Bağırov qeyd edib.

Amma DİN-in mətbuat xidmətinin rəhbəri Ehsan Zahidov Turan-a bildirib ki, qeyd edilən məlumatlar həqiqətə uyğun deyil. -06D-