Dövlət Gömrük Komitəsi türk sürücülərin sərhəddə rüşvət haqqında ittihamlarını təkzib edir

Bakı/04.05.21/Turan: Azərbaycan mətbuatında Türkiyəli böyük yük avtomobili sürücülərinin və Türkiyə nəqliyyat şirkətinin sahibinin Azərbaycan gömrüyündə rüşvətxorluq haqqında şikayətləri dərc edilib.

“Qırmızı Körpü” nəzarət-buraxılış məntəqəsindən Azərbaycana girişdə türk sürücülərdən 315 dollar qanuni ödəniş alırlar, bir halda ki, Gürcüstan sərhədində onlardan cəmi 61 dollar alınır.

Qanuni ödənişdən əlavə, gömrükçülər rüşvət alırlar, tezalışan maddələrin daşınmasına görə ayrıca ödəniş tələb edirlər, baxmayaraq ki, başqa ölkələrdə belə bir tələb yoxdur, deyə böyük yük avtomobillərinin türk sürücüləri bildirirlər. Sürücü Azərbaycan gömrükçüsünə tələb etdiyi hər şeyi verməsə, maşını 5-6 gün sərhəddə ilişir. Amma gömrükçülərin tələb etdiklərini verdikdə belə sürücülər zəruri sənədlərin tərtib edilməsi üçün 5 saata qədər gözləyirlər, deyə sürücülər qeyd edir.

Turan Azərbaycan Dövlət Gömrük Komitəsinə türk yük daşıyıcılarının iddialarına cavab vermək xahişi ilə sorğu göndərib. Gömrük Komitəsi cavab məktubunda mətbuatın sərhəddə baş verənlər barədə səhv və həqiqətə uyğun olmayan məqalələr dərc etdiyini bildirib. Komitə qeyd edir ki, sərhəddə bütün ödənişlər qanunidir, Azərbaycan Respublikasının Vergi Məcəlləsinə, Təhlükəli Yüklərin Daşınması haqqında Avropa Müqaviləsinə uyğundur. Bu zaman yükün təhlükəlilik dərəcəsi haqqında istehsalçının sertifikatı diqqətə alınır.

Məktubda həmçinin xarici sürücülərdən Azərbaycan Respublikası Vergi Məcəlləsinin 210-cu maddəsinə uyğun olaraq vergi tutulduğu, bu verginin ölçüsünün yolun uzunluğu, yükün və maşının çəkisi, ölkədə qalma müddəti ilə bağlı olduğu bildirilir.

Yük daşıyıcılarının vergi və rüsum ödənişindən azad edilməsi üçün qanuni imkanlardan istifadə olunur.

Gömrük Komitəsi Türkiyə və Azərbaycan arasında bağlanmış beynəlxalq daşımalar haqqında ikitərəfli müqavilədə yol vergisindən azad edilmənin nəzərdə tutulmadığını bildirir.

Qanunla nəzərdə tutulmayan ödənişlərin alınmasının, həmçinin yüklərin gömrük məntəqələrindən keçməsinin qarşısında süni maneələr yaradılmasının qeyri-mümkün olduğu vurğulanır. Gömrük Komitəsi konkret hadisələrlə bağlı araşdırma aparmağa və bu barədə ictimaiyyəti məlumatlandırmağa hazır olduğunu bildirir.

Dövlət Gömrük Komitəsi Türkiyə və Azərbaycan arasında 20 illik yük daşımaları ərzində yalnız 2021-ci ildə qonşu ölkənin sürücülərinin narazılıq bildirməsinə təəccüb edir.

Dövlət Gömrük Komitəsi cavabının sonunda Azərbaycan və Türkiyə arasında qardaşlıq münasibətlərinin möhkəm və sarsılmaz olduğunu vurğulayır. -0-