DTX keçmiş naziri həbs edib

Bakı/04.02.21/Turan:  Keçmiş əmək və əhalinin sosial müdafiəsi naziri Səlim Müslümov səlahiyyətlərini aşmaq və rüşvət almaq ittihamı ilə həbs edilib. Bu barədə bu gün Dövlət Təhlükəsizliyi Xidməti (DTX) məlumat yayıb.

Press-relizə əsasən S.Müslümovun bu qurumun rəhbəri olduğu dövrdə Əmək və Əhalinin Sosial Müdafiəsi Nazirliyinin fəaliyyətindəki çoxsaylı pozuntular barədə daxil olmuş məlumatla bağlı DTX-də araşdırma aparılıb.

S.Müslümovun qulluq səlahiyyətlərindən tamah niyyətilə istifadə edib dövlətin qanunla qorunan mənafelərinə ağır nəticələrə səbəb olan zərər vurmasına, habelə onun tərəfindən tabeçiliyində işləyən vəzifəli şəxslərdən vasitəçi kimi istifadə etməklə müxtəlif rayonlarda əlillər üçün fərdi yaşayış və internat evlərinin tikinti-təmirinin aparılması işlərini yerinə yetirən fiziki və hüquqi şəxslərə ayrılmış pul vəsaitlərinin bir hissəsini tələb edərək almasına əsaslı şübhələr müəyyən edilib.

Eyni zamanda, nazirliyin müxtəlif ərazi şöbələrinin rəhbərlərindən 10 mindən 30 min manatadək rüşvət alması faktları müəyyən edilib.

Yuxarıda sadalananlarla əlaqədar S.Müslümova qarşı Azərbaycan  CM-in 308.2-ci (ağır nəticələrə səbəb olan vəzifə səlahiyyətlərindən sui-istifadə), 311.3.2-ci və 311.3.3-cü maddələri (təkrar külli miqdarda rüşvət alma) ilə ittiham irəli sürülüb və barəsində həbs qətimkan tədbiri seçilib.

İstintaq davam edir.—06D-